Daj ndwen 11 hwnj, Veiz Goz- cingh mboujduenh deng “laegdingh” ciepraen vunzlai roxnaeuz ciepsouh baebuenq, caemhcaiq song baez daibyauj Gihdangjveij youq Nanzningz Yinzminz Gunghyenz banh gij hoihcomz hung gwnzde guh genjcaz. Hoeng vunzlai cungj mbouj hawj de doenggvaq, de saedcaih nanz lijgaij.

Bi 1967 ndwen 1, Gveilinz baij- cauhfanj genhciz aeu Veiz Gozcingh bae Gveilinz guh genjcaz, danghnaeuz Veiz Gozcingh mbouj bae, gyoengqde cix rag gij doih hung daengz Nanzningz. Gak dieg baijcauhfanj, caemh cungj haep naeuz yaek bae Nanzningz doxcomz, baebuenq aen Swcigih Dangjveij yungh Veiz Goz- cingh、Gyauz Yaujgvangh guh daibyauj haenx hengzguh gij lohsienq fanjdoengh swhcanjgaihgiz gyoengqde laih haenx. Veiz Gozcingh gamjdaengz cingzgvang youqyaenj lai, daihbang vunz yaep ndeu cix doxcomz youq Nanzningz, lau Nanzningz souh mbouj ndaej. De gietdingh daiq bingh bae Gveilinz guh genjcaz, it siengj bang Nanzningz gemjap, ngeih siengj bang gak gaep lingjdauj rap di cwzyin.

De yawjraen gak gaep lingjdauj ganbu deng rag bae baedaeuq, daenj mauhsang youzgai okcouj, deng hangz deng vaihnaj, sim gig in. De caeuq Gyauz Yaujgvangh daengj vunz naeuz: “Guengjsae guh hong miz vwndiz, cujyau dwg raeuz miz vwndiz, vihmaz hawj baihlaj caemh souhcoih ne?”

Seizhaenx, binghgaeuq de gaenq fukfat, mbangj cangzveij cungj yienq de gaej bae lo. De cix gangjfug daihgya, daj daengxbuenz Guengjsae bae naemj, mbouj goq bonjfaenh ancienz, lienzhaemh daiq bingh naengh cigizbuj bae Gveilinz.

Baez daengz Gveilinz, Veiz Gozcingh saedcaih cengq mbouj ndaej lo, gyaeuj ngunh da raiz, cijndaej ninz mbonq. Couh Wnhlaiz cungjlij dwk dienhvah bae Gveilinz ra de, de hwnq mbouj ndaej, cungjlij cix daengq vunz cuengq dienhvah youq gyaeujmbonq de. Cungjlij cam Veiz Gozcingh vih- maz bae Gveilinz? De cix ciuq saehsaed gangj hawj cungjlij nyi. Cungjlij cam:“Byawz gaem hong Nanzningz?” De naeuz dwg Gyauz Yaujgvangh gaem. Cungjlij daengq de aeu rendang ndei, lij naeuz guh genjcaz hawj vunzlai goj aeu caj bingh ndei di le caiq bae guh ma! De gig docih cungjlij gvansim caeuq gyaez- hoh de. (caengz sat)