Song cien lingz cib haj

Raeuz caj daengz biyiengz

Gvaq cieng van lumj diengz(dangz)

Ciengq go youh diuq foux

Gaijfang roekroek bi

Guek bienq ndi lumj veh

Baengh guekcoj daxmeh

Gej ndei gwndaenj raeuz

Gungcanjdangj dazyinx

Yinxminz ndaej vuenyungz

Mbouj lumz mwhnduj gungz

Miemh cingz hung daengznauq

Gijgenj veiyi naeuz

Dangjfungh aeu lenzcwng

Fanj fujbai doucwngh

Fwngz gaem cungj mbouj cuengq

Fanjfuj youq gwnzroen

Ngoenzngoenz byaij baenaj

Roeb guk couh aeu gaj

Daj dai gyoengq nengznyaen

Bi moq giva moq

Suengsoq cij danggya

Gak nieb caez hai va

Guekgya doh fanzyungz

Gaijgwz aeu haeujlaeg

Gaihfang yaek mbe’gvangq

Doenghva caez hailangh

Mauxdan angj Cunghvaz

Gvaq cieng diensiengq moq

Simcingz doh angqyangz

Gak cuz caez ndwn sang

Fwen danq dangj hungmbwk

Gvaq cieng gwn caeuzngaiz

Mbouj ndaej sai haeuxbyaek

Gaenx mbaet eiqsei laeg

Hwnj mbaek meijdwz sang

Siengjmuengh Cungguek raeuz

Aeu byaij haeuj siujgangh

Byaij riengz Gungcanjdangj

Mbwn sang goj bae daengz