●Bineix ndwencieng, Lungzswng Gak Cuz Swciyen cujciz vunzlai guh youzyenz、vwnzyi comzyienj、roengz mbanj cuengq denyingj daengj hozdung, hawj gak minzcuz ginzcung vwnzva swnghhoz gvaq ndaej engq ndei.

(Veiz Gizyangz)

●Bi’gvaq, Lozcwngz Mulaujcuz Swciyen dawz gij dihbauj ndawsingz daj moix ndwen 205 maenz daezsang daengz 240 maenz, dawz gij dihbauj lajmbanj daj moix ndwen 84 maenz daezsang daengz 100 maenz, bi’gvaq aen yienh neix fat 6980.24 fanh maenz hawj 3528 boux ndaej dihbauj ndawsingz nem 50618 boux ndaej dihbauj lajmbanj.

(Veiz Yuzdai)

●2 nyied 16 hauh, Yungzanh Yen Daliengz Cin Sinhcai Cunh gawjhengz vaiz doxdaemj doxdax, miz 24 duz vaiz doxdaemj beij ak, neix yinx baenz cien vunz daeuj yawj. Ciuq cam rox, Bouxcuengh dangdieg doenggvaq aen hozdung neix, muengh bi moq ndaej fungsou, doengzseiz angqcoux bi moq daeujdaengz.

(Vangz Gozliengz)

●Ndwencieng, Yungzsuij Myauzcuz Swciyen 200 lai aen yezyiz vwnzyidui banh le 300 lai ciengz vanjvei gag bien、gag cujciz、gag yienj, gij vwnzyidui neix youz Myauzcuz、Yauzcuz、Dungcuz、Bouxcuengh daengj vunz saujsu minzcuz gyoebbaenz, neix hawj vunzlai dangdieg ndwencieng ndaej yawj vwnzyi cezmuz gig lai, gvaq cieng gig angq

(Lungz Linzci)

●Geij ngoenz gonq, Hocouh Siveij、Si Cwngfuj gya roengz gij cienzngaenz fazcanj saujsu minzcuz, daj bi’gvaq 18 fanh gya daengz bineix 50 fanh. Dangqnaj gaenq dawz gij cienzngaenz neix faen daengz gak yienh(gih) caemhcaiq roengz daengz gak cunh(mbanj) saujsu minzcuz, hix gya guh hanghmoeg dajndaem dajciengx、vwnzva、veiswngh.

(Vangz Genhungz)