Seizdoeng haujlai vunz cungj haengj gwn hojgoh, danhseih yungzheih yinxhwnj hwnjhuj, baihlaj gaisau sam cungj caz nyinh saej siu huj hawj daihgya:

Caz makbug: Ndaej nyinh saej siu huj. Vunzraeuz gwn huqnywnx lai le, rox baenz haexgaz, ndigah, ngoenznaengz ceiq ndei gwn di caz makbug ndeu, aenvih caz makbug bien liengz, ndaej nyinh saej siu huj. Boux baenz binghnyouhdangz, danghnaeuz ngoenzciet gwnndoet gamhanh mbouj ndei, hezdangz couh yungzheih fubfeb, ndaw caz makbug hamz miz yizdaujsu doxgaiq, ndaej bang vunzraeuz gyangq hezdangz.

Caz megmienh: Ndaej cangq dungx gej nywnx. Gvaq ciet doxcomz gwn noh gwn bya, lainoix cungj gwn di doxgaiq nywnx ndeu, gijgwn yungzheih cwk youq, baenzneix, ndaej gwn di caz megmienh ndeu. Ndaw caz megmienh hamz miz denfwnjmeiz, ndaej demgya veisonh caeuq danbwzmeiz aendungx, ndaej bangcoh siuvaq siu cwk、cangq dungx gej nywnx.

Cazloeg: Ndaej siu huj leih nyouh. Cazloeg ndeicawq gig lai, de ndaej siu huj leih nyouh, boux baenz hezyaz sang ceiq ndei gwn di cazloeg ndeu.