●1 nyied 26 hauh daengz 28 hauh, Gvangjsih Ginhvanh Denswj Yinhsieng Cuzbanjse 7 boux ingjsiengq daengz Lingzyinz Yen ingjguh giluzben《Bouxcuengh》. Ciuq cam rox, baez neix aeu doenggvaq ingjguh gij lizsij vwnzva Bouxcuengh gyaeraez, lwnh- gangj vwnzva daegsaek dieg Boux- cuengh, baijok lizsij vwnzva noengzna Bouxcuengh gih raeuz.

(Vangz Yenzyungz)

●Geij ngoenz gonq, Lungzswng Gak Cuz Swciyen cienmonz guh sam ndwen hozdung bangcoengh vunz gvaq seizdoeng, daengz dangqnaj, aen yienh neix gungh baij 50 vunzbaez、30 lai baez ci, bangcoengh 37 vunzbaez, fat doenghyiengh dingjnit nem gijgwn 40 lai faenh, mizyauq dwk hawj boux- louzlangh onjsim gvaq seizdoeng.

(Veiz Gizyangz Dwng Siuhbingz)

●Bi’gvaq, Yungzsuij Myauzcuz Swciyen 80 aen giyez sinhcingj ndaej minzcuz mouyi daigvanj 3.12 ik maenz, ndaej boujdiep leihsik 735 fanh maenz, doengzbeij gyalai 208.8%. Hengz aen youhvei cwngcwz neix, gig ndei dwk hawj gij minzcuz mouyi giyez aen yienh neix ndaej fazcanj.

(Huz Gozcenz Lanz Genmingz)

●Bi’gvaq, Lozcwngz Mulaujcuz Swciyen roengz 6980 fanh maenz, fat gij cienzngaenz bauj ndaej gvaq saedceij ceiq daemq de hawj doenghboux gungzhoj ndawsingz lajmbanj, gij suijbingz saedceij gyoengqde daemq gvaq baujcang, neix couh gig ndei dwk bauj vunzlai gwn imq daenj raeuj.

(Veiz Yuzdai)

●Geij ngoenz gonq, gih raeuz 2015 nienz daengx gih vwnzva gunghcoz veiyi ok siusik, Dahcojgyangh vehdat Byaraiz vwnzva gingjgvanh dwg aen hanghmoeg dog gaenq ndaej dinghguh 2016 nienz guek raeuz sinhbau seiqgyaiq vwnzva yizcanj.

(Lungz Yenyingh)