1、Raemxhing riengx bak. Conghbak baenz biux naeuh seiz, yungh raemxhing ndat riengx bak, ngoenz 2 daengz 3 baez, itbuen riengx 6 daengz 9 baez, giz biux naeuh couh hainduj raen ndei.

2、Yungh veizswnghsu B2 oep. Aeu veizswnghsu B2 ngenz baenz mwnh, dwk di youzhom ndeu ndau yinz hawj de gwdlet, oep giz biux naeuh, ngoenz oep 4 daengz 6 baez. Veizswnghsu B2 mbouj saep mbouj haemz, feih hom, mbouj gig giz biux naeuh, hix ndaej dingz in, lienz oep 2 daengz 3 ngoenz, giz biux naeuh couh ndei.

3、Raemxcaz riengx bak. Aenvih ndaw caz hamz miz lai cungj veizswnghsu, ndaej fuengzceih gak cungj haenz in, doiq ceihyw conghbak biux naeuh miz itdingh bangbouj cozyung.

4、Raemx lauxbaeg ngaeux riengx bak. Aeu 2 aen lauxbaeg ndip, donh ngaeux ndeu swiq seuq caez daem yungz nyaenj aeu raemx de hamz ndaw bak riengx dwk, ngoenz 3 baez, lienz yungh 4 ngoenz couh raen miz yaugoj.

5、Yungh ywnaed veizswnghsu C led. Ngenz ywnaed veizswnghsu C baenz mwnh led gizde, led baez daengz song baez couh raen miz yaugoj. Led 2 daengz 3 ngoenz giz biux naeuh couh ndei.

6、Led veizswnghsu E. Cim mbongq veizswnghsu E gyauhvanz, nyaenj aeu ywraemx ma led giz biux naeuh, louzce 1 faen cung, moix ngoenz led 4 baez, youq mwh gwn haeux gvaq roxnaeuz yaek ninz seiz led, itbuen led 3 ngoenz couh ndei.

Boux baenz conghbak biux naeuh, ngoenznaengz gwnndoet aeu haeujsim, gaej gwn lwgmanh、meiq、hing、coeng、batgak. Aenvih gwn gij huq neix rox gig giz biux naeuh, gizde engqgya insep, giz biux naeuh rox gya hung nanz ndei.