Bonjbauq siusik(gicej Suh Gyahgvai/苏加快) Bonj sawyw Ywcuengh Camz Lwed Ywbingh youz guek raeuz boux Ywcuengh cujyin yihswh daih’it Lij Linz cawjbien 《Yenzgiu Gij Gisuz Cauhcoz Gveihfan Caeuq Wngq- yungh Ywcuengh Camz Lwed Ywbingh》 gaenq ndaej hoiz baenz Sawcuengh, yawhgeiq mbouj geij nanz couh yaek caeuq gyoengq bouxdoeg raennaj lo.

Bonj sawyw Ywcuengh camz lwed ywbingh neix dwg Guengjsae Bouxcuengh raeuz sawyw ndawde bonj daih’it baeznduj hoiz baenz Sawcuengh, miz lijcwngzbeih yiyi hungloet. Bonj sawyw neix baen miz bien baihgwnz、bien cungqgyang、bien baihlaj sam bien. Bien baihgwnz dwg gij gisuz cauhcoz gveihfan Ywcuengh camz lwed ywbingh fuengfap, ndawde genjdanh gaisau le gij lizsij Ywcuengh camz lwed ywbingh、gihbwnj lijlun、cujyau daegdiemj、cozyung gihlij、senj giz hezvei、cauhcoz fuengfap caeuq haeujsim saehhangh daengj. Bien cungqgyang dwg linzcangz wngq- yungh Ywcuengh camz lwed fuengfap, cungdenj gaisau le Ywcuengh camz lwed yw neigoh、vaigoh、fugoh、wzgoh、vujgvanhgoh、binghgip daengj goh 70 lai cungj bingh ciengz raen caeuq yw mbangj bingh ngeiznanz. Bien baihlaj daihgaiq gaisau le ciuhneix yenzgiu Ywcuengh camz lwed fuengfap, baugvat 40 lai cungj bingh baenzlawz guh linzcangz yenzgiu caeuq saedniemh yenzgiu daengj.

Bonj sawyw neix ndaej fanhoiz baenz Sawcuengh oksaw, de couh yaek doiq Ywcuengh cienzboq caeuq doigvangq miz cizgiz cungyau coicaenh cozyung, caemh vih hozcoz yihliuz lajmbanj moq caeuq ndawsingz segih veiswngh gensez fazcanj guh ok faenh gungyen ndeu.