Ranz miz nyeziq ndeicaemz lailai, ranz miz nyeziq hix dwgrengz lailai. Ranghlwg cib ndwen cix doekseng okdaeuj, ndang in ndang dot, byonghhwnz lij hwnjdaeuj uet haex doq nyouh, bwnq neq bwnq haeux, lox riu rumx ninz. Vahsug naeuz, lajmbwn gij gyaez ceiq naekna de couh dwg gij gyaez daxmeh lo, banneix caj gou baenzmeh le cix roxnyinh daengz, dang bouxmeh lajmbwn caen mbouj ngaih ha.

Geij bi neix youq rog dajgoeng, lwg’iq hix dwg youq diegrog doekseng lo. Bouxboux beixnuengx cungj naeuz, youh dajgoeng youh dawzlwg dwgrengz lai lo, vihmaz mbouj ce lwg’iq youq ranzmbanj hawj bohmeh coengh dawz? Lwgnyez couhdwg gwnzndang bouxmeh doek roengz gaiqnoh ndeu, miz bouxmeh lawz cuengqsim ndaej gvaq. Caiq naeuz, bouxlaux ciengzseiz naeuz daengz, lwg mbouj nem meh, baezlaeng lwg maj le mbouj ndiep meh lo. Lwgnyez seizneix mij doengz seizgonq lo, mij dwg caih de gwn imq daenj raeuj cix ndaej, lij yaek aeu de gwn ndei youq van, haiuk son’gvai ha. Lwg’iq gwq ngoenz gwq maj lo, youq gij ndwenngoenz majhung ndawde, hix miz haujlai saeh ndeiriu ndeicaemz.

Lwg’iq hag gangjvah seizde, baenzngoenz yiyi yaya mbouj daengx. Son de gangj vahraeuz: “Heuh daxmeh vei nuengxiq.” De couh riengz gangj “da me me……”, lumjbaenz duzyiengz heuh nei ndeiriu lai lo. Caiq cam de: “Duzma guhlawz heuh ya?” “Vouh vouh……”. “Duzmeuz guhlawz heuh ya?” “Mauh mauh……”. “Duzgaeq ne?” “Cih cih cih……”. “Duzroeg ne?” “Cih cih cih……”. “Duzroeg caeuq duzgaeq cungj heuh baenz cihcihcih ya?” Lwg’iq gaiqnaeuz de swhgeij gangj mbouj deng, cix swenj daej nga’nga lo. Mwngz yied bae lox de, de yied daejhaenq, doeklaeng yaeuh de naeuz, duzgaeq heuh cihcihcih lo o, duzroeg hix heuh cihcihcih lo o, nuengxiq gou gvai lai lo o, de cix daej daengx roengzdaeuj.

Miz mboengq ndeu, lwg’iq gyaez loengh soujgih, soujgih gwnz miz duzroeg ha duzma ha, fwngz yaep roengzbae, duzde cix rox saet bae saet dauq, lwg’iq cix riengz de bi fwngz bi hangx, ndeicaemz raixcaix. Soujgih deng de yaep baenz dwk dienhvah okbae lo, baihde miz vunz ciepdingq le, soujgih sawqmwh hongz daengz: “Vei, mwngz ra bouxlawz ha? Vei, gangj vah vei?” Lwg’iq doeksaet yat, vit aen soujgih le daejnya’nya hwnjdaeuj. Lox de naeuz soujgih ndawde dwg daxgoeng gangjvah, mwngz lij roxgeiq daxgoeng lwi? Lwg’iq yaepyaep lwgda, raemxda lij gamz youq ndaw gokda de cix han naeuz:“Daxgoeng bae ciengx vaiz, daxyah bae ndaem naz.”

Meh gou dwg boux dang lauxsae, banneix geq le hix mij son saw lo. Miz mboengq ndeu de roengzdaeuj coengh gou dawz lwg’iq. Seizde lwg’iq hix ngamq hagrox byaijloh, rox ruenz, rox ndwn, rox byaij hoeng byaij mij bienz, sam mbouj seiz cix daenghnaengh youq gwnzdieg daejnga’nga, gou cix simgip yaek dai, lau de deng laemx in roxnaeuz deng sieng. Baezbaez de laemx le, gou cungj sim’in bae rex de hwnjdaeuj. Miz mbat ndeu, lwg’iq youh laemx lo, caekhangx naengh youq gwnzdieg daej, gou ngamq yaek bae rex de, dingjlingz meh gou cix naeuz gou: “Hawj de gag hwnjdaeuj, baezlaeng sibgvenq bae lo, ngoenz lawz caengj rox byaij ne.” Meh gou daengz henzndang lwg’iq lox de: “O, laniq gou in lai lova, dwg duznou lajnamh deng laniq gou laemx lo.” Meh gou aeu din ndeu roengzrengz daemh gwnzdieg, singhaenq naeuz: “Duznou dai, hawj laniq gou laemx, dub dai de bae! Mbouj aeu duznou neix!” Lwg’iq aiq dwg raen geizheih lai lo, yawj daengz meh gou loengh yienghneix, lumz liux indot lo. De gag ndwn hwnjdaeuj, saetsaet daemh- daemh song sam mbat, cix haeuj rungj meh gou bae lo. Gvaq le geij ngoenz, miz song boux baengzyoux daeuj ranz gou, lwg’iq hix mij lau vunzseng, caeuq bouxboux cungj ndeicaemz. Sawqmwh dingqnyi “bung” sing ndeu, lwg’iq naengh laemx gwnzdieg lo, laemx baenz haenq, banneix aiq in yaek dai lo. Gou gaiqnaeuz de yaek aj bak enj dungx daej yaek dai bae. Bouxlawz rox, de mij daej, menhmenh ruenz hwnjdaeuj, bongx buhvaq, caiq aeu song din daemh gwnzdieg geij mbat, damzbyoedbyoed naeuz: “Dub dai duznou neix, mbouj aeu duznou neix, duznou neix mbouj ndei saek di……” Baengzyoux gou yawjraen le cungj riu ndaej dungxin liux.

(caengz sat)