Bi’gvaq sujgyaj, gou caeuq daxboh daxmeh guh haujlai hongnaz: Ciemz duhdoem, sou haeuxyangz, ndaemnaz daengj- daengj, hawj gou ceiq nanzlumz dwg gou caeuq daxboh bae ndaemnaz gienh saeh neix.

Ngoenzhaenx gyanghaet, gou caeuq daxboh bae daengz ndaw naz, yawjraen ndaw naz boengzbodbod, gou baez iet din roengz naz, couh sikhaek deng gij boengz raeuzradrad haenx dumh daengz gyaeujhoq, ndwn youq ndaw naz bouxvunz lumj gwn laeuj fiz nei, baenzlawz ndwn hix ndwn mbouj maenh. Gou siengj yungh rengz yut din, youh mbouj gamj daiq yungh rengz, lau deng laemx ndaw naz, gou menhmenh siujsim sisi dwk yamq din……Gvaq yaep ndeu, gij boengz cabheiq neix lumj roxnaj gou nei, caeuq gou gyau baengzyoux, mbouj caiq daeuj gaz din gou lo, gou byaij ndaej swnh haujlai.

Hainduj ndaemnaz lo, gou caeuq daxboh gek hai, swhgeij riuj doengj gyaj bae gizwnq ndaem. Gou baez go baez go dawz gyaj ndaem roengz naz bae, go’gyaj lumj dahsau najmong nei, ngaemgyaeuj roengz. Daengz gizdieg boengz haemq laeg haenx, din gou cap youq ndaw boengz beng mbouj okdaeuj, gou cuengq gyaj roengzdaeuj, yungh fwngz beng cik din, baez mbouj siujsim deng laemx youq ndaw boengz, buhvaq aennaj gou cungj dwg boengz, gou mbouj goq buhvaq uq, uet aennaj le, youh laebdaeb ndaemnaz.

Yawj gij gyaj gou ndaem haenx, vang yawj baenz coij, soh yawj hix baenz coij, gou yienznaeuz daengx ndang uq boengz, youh miz di baeg, hoeng ndawsim gou cix diemzsisi.

Ndaemnaz gienh saeh neix, hawj gou roxndaej naedhaeux ndaej daeuj mbouj yungzheih, raeuz aeu insik naedhaeux.

（指导老师：方雪珍）