Ranzmbanj gou dwg youq lajmbanj. De yienznaeuz mbouj lumj ndawsingz yienghhaenx nauhyied, caemhcaiq miz di fwz, hoeng gou gig gyaez ranzmbanj gou.

Gyanghaet, gou hwnqmbonq seiz, hai aen conghcueng, couh fatyienh cungj gingjsaek ndeu. Cungj gingjsaek neix couhdwg yienghneix:

Baez daengz gyanghaet, ndaw mbanj couh nauhyied hwnjdaeuj lo, bouxhung mbangj bae ndaw reihnaz guh hong, mbangj bae henz dah saeg buhvaq, mbangj bae ndaw suen rwed byaek……lwgnyez iq couh youq ndaw mbanj guh’angq.

Daengz banngaiz le, ndaw mbanj dauq yienhndaej caem haujlai, aenvih gyoengqvunz guh le buenq ngoenz hong dauqma, cungj dwg ngaiz lo, couh youq ranz yietnaiq, ndigah ndaw mbanj youh caem haujlai.

Daengz banhaemh le, ndaw mbanj youh dauq nauhyied lo. Gyoengqvunz lajbyonghngoenz bae guh hong haenx gaenq dauqma lo. Gyoengqvunz ndaw mbanj hainduj cawj caeuz lo, ranzranz cungj raen miz hoenzfeiz daj conghheuq swng hwnjdaeuj, gij gingjsaek neix ndeiyawj dangqmaz.

Ronghndwen swng hwnjdaeuj lo, ndaundeiq hix youq gwnz mbwn yaep da dwk, roeg mbouj heuh lo, cij dingqnyi daekgaeuj heuh getget,bouxlaux lwgnyez cungj ninz ndaek lo, ndaw mbanj yienhndaej engq caemdingh lo.

Neix couhdwg ranzmbanj gou, mizdi daegbied ba.（指导老师：韦凤玲）