Lanz Gen gietdingh laeujfiz baez ndeu, ndigah de bae ndaw diemqlaeuj “Vunz Lajmbanj” aeu sam bingz laeujlingzcih bonjdeih daeuj, boux dog gag gwn.

Diemqlaeuj “Vunz Lajmbanj” gig miz daegsaek. Diemqlaeuj cuengq gij go gij yinhyoz haenx, cungj dwg aeu fwen bonjdeih gaij baenz, gig miz feihdauh diegbya bonjdeih, youh miz sihyangz yinhyoz yenzsu, gig ndei dingq, gig yinx vunzlai daeuj dingq, seng’eiq diemqlaeuj couh gig ndei.

Baihrog diemqlaeuj aenci ceiq laeng haenx lizbae, gij yinhyoz ndeidingq haenx mbouj ciengq lo. Lanz Gen gwn liux cenj laeuj ceiq laeng, yinhyoz ndeidingq, laeuj ndeigwn, gwn sam bingz laeujlingzcih gingyienz caengz fiz. De dwg siengj haemhneix yungh liux cienz ndaw ndang, hawj swhgeij fiz baez ndeu.

“Daeggo, diemqlaeuj song diemj gven dou, cingj ngoenzcog caiq daeuj ba.” Boux dahsau ndeu ndwn youq henzndang de, maekda hunghung, sing gig van. Lanz Gen aenndang saenz mbat ndeu, naeuz: “O, ndei.” De aeu ok duhdoem swhgeij gag daiq daeuj haenx, boek naed ndeu vut haeuj ndaw bak bae. Aennaj de nding youh hau.

De nunu aenfwngz, cam dahsau: “Gwn duhdoem lwi?”

“Mbouj gwn, docih mwngz.” Dahsau miz di doeksaet.

“Gwn naed ndeu ba, dwg duh- doem naengndaem, guj mwngz caengz ndaej gwn gvaq. Neix dwg ranzmbanj gou ndaem ne, yiengh hom de gig daegbied, mwngz nyouqnyouq, loh hom neix, nanz gangj ndaej ok bak…… ”

“Doiq mbouj hwnj, ndaw diemq gvidingh, dou mbouj ndaej gwn doxgaiq bouxhek.” Dahsau riuhihi, gokda loh ok di yiengh ngaizhwnz.

“Mwngz daengz neix mbouj geij nanz ba? Lumj mbouj gvenq banh- haemh guh hong. Duhdoem neix ndaej dizsaenz, mwngz cuengqsim, haengj- dingh mbouj miz doeg ……” Lanz Gen gangj liux gag riu hwnjdaeuj.

Dahsau goj riu hwnjdaeuj. “Mwngz dwg boux guh gvangjgau ba?” Dahsau cam.

“Mbouj dwg bw! Gou guh hong doisiu. Gou mbouj maij guh gvangjgau, gvangjgau cejdaihbauq lai. Gou ngeix vwndiz mbouj cienzmienh, guh saeh mbouj suenq vaiq, gou mbouj maij gyaban, gou maij doisiu ……”

Lanz Gen roxnyinh dahsau neix gig gyaeundei, mbouj rox gag gangj liux vah gijmaz. Saedcaed de guh doisiu song ndwen, lij guh mbouj baenz gij yinvu gunghswh hawj de haenx.

“Mwngz gangj vah coenzcoenz raeuzrad miz rengz, danghnaeuz guh gvangjgau, itdingh dwg boux vunz gvangjgau ak ndeu.” Dahsau riu naeuz.

“Caen ha?”

“Song diemj lo, daegmbauq.” Yawjraen lingxban ciuz de byaij daeuj, dahsau ganjgaenj naeuz.

Lanz Gen bibuengq ndwn hwnj- daeuj, gaem hwnj geu buhrog venj youq gwnz aendaengq, naeuz:“Baenzneix laeuj ndei, goj mbouj hawj vunz gwn doh, baenzlawz guh seng’eiq?” De byaij loh gaenq mbouj maenh, aenbak namhbiedbied, byaij ok baihrog bae.

Lanz Gen mbouj dingz namhgangj coenzvah dahsau haenx, mbouj rox baenzlawz dauq daengz ranz swhgeij.

Lanz Gen laebdaeb geij ngoenz buenq bae Sinhvaz Suhden yawj saw gvangjgau. De raen aen hangz neix, gij vunz byonghloh gaijhangz guh gvangj- gau gig lai. De haeujsim yawj gvaq haujlai cauhbin gvangjgau, roxgyinh swhgeij goj hab guh hong gvangjgau. Yienghneix, de gietdingh bae gvangj- gau gunghswh yingbin. Daengz ranz daihbet gvangjgau gunghswh seiz, cij dapwngq aeu de, ginghlij sawq yungh de ndwen ndeu. Ranz gunghswh neix heuhguh “Cangyi”, gunghswh bangunghsiz mbouj hung, vunz mbouj noix, cib geij boux vunz caenx youq itheij, ngoenzngoenz haihoih yungh uk, Lanz Gen naeuz, de gyaez aen gifwn neix.

Hwnjban aen singhgiz ndeu, Lanz Gen raen swhgeij hab guh gvangjgau, de daez geij diuz yi’gen cungj ndaej yungh, bouxhek lij raen ndei, ginghlij doiq de gig habhoz.

Singhgiz roek, Lanz Gen bae daengz “Vunz Lajmbanj”, de yaek bae yawj dahsau haenx, yaek bae docih de, hoeng, dahsau mbouj youq ndaw diemqlaeuj, de gaenq swz hong mbouj guh lo.

“De ngoenzlwenz swz bae.” Vunz diemqlaeuj naeuz hawj Lanz Gen nyi. Lanz Gen roxnyinh ndawsim in raq ndeu, haujlai nanz mbouj lae raemxda, seizneix gag doeksubsub roengzdaeuj.

Ngoenz daihngeih, Lanz Gen gag simnyap, de cingq sij aen duhdoem naengndaem gvangjgau ndeu, moengz- loengz dingq ndaej ndaw bangunghsiz ginghlij cienz daeuj sing gig sug: “‘Vunz Lajmbanj’” youhsi mauh gvaq, gyaqcienz daemq, fuzvu ndei, hoeng, laeuj de cizlieng mbouj sang, neix dwg gizhong raeuz yaek guh ndeu, raeuz hag gij ndei bouj gij yaez……”

“Mwngz ndei, gou dwg ginghlij, angqcaeux mwngz gyahaeuj‘Cangyi’”. Cingq ngengrwz nyi seiz, gij sing unqswnh diemzsi haenx youq gyaeuj- rwz yiengj hwnjdaeuj, Lanz Gen aennaj nding lo, de ndwn hwnjdaeuj, angq- faengfaeng lumjbaenz youh ngaiz fiz nei……