Aeu gaem ndei gij daegdiemj Guengjsae, fazveih gij raezcawq dieg raeuz, haekfug gij dinjcawq dieg raeuz. Lumjnaeuz, guh gij daenj, raeuz ndaem gofaiq yaez gvaq vunz, hoeng raeuz miz youzcoengh、maenzfaex、youzsoengciet, lij miz dienhraemx caeuq rinhoi, ndaej guh rindienh, yienghneix cix ndaej cauh nizlungz、dizlunz、veiznizlungz. Duenhneix miz vunz guh goyaed bienqsingq, dangh- naeuz baenzgoeng le, raeuz miz daihbaj goyaed cix ndaej dawz okdaeuj guh gij daenj lo.

Seizneix, ceiq youqgaenj dwg caep ndei goekdaej, aeu daegbied gaem ndei gihgai、vagungh、lienh gimsug, caemh mbouj ndaej yawjsiuj ginghgungh caeuq hongdinfwngz. Aeu cugbouh bouj gij doxgaiq lemq caez bae, soujsien aeu bouj gij doxgaiq yungh ndaej ceiq gaenjgip haenx gonq, lumjnaeuz dienhsienq、denswz、doucab gaucung’ap、gienhbiucinj、ganghabgim、youjgih hozcwngz vayoz daengjdaengj. Vuzsenden raeuz lij caengz miz gvaq, ceiqndei dwg guh di okdaeuj. Raeuz vunz、ngaenz caeuq doxgaiq cungj mizhanh, aeu yungh ndei bae.

Gunghyez gihgai, cawz miz mbangj guzgan le, lij aeu hawj gij cangj nungzgai conhgih、yienh haenx ndaej guh hwnjdaeuj. Aeu baez yamq baez yamq demgya di sezbei cienyungh ndeu, daezsang gij naengz- lig baenzdauq gunghyez gihgai, daegbied gij naengzlig baenzdauq sezbei dienhraemx iq、vafeiz iq、aencaqdangz iq、suijniz iq haenx. Lumj Liujgih、Liujdung、Dienhbiuj Gveilinz daengj gij cangj neix, aeu it faen baenz ngeih, ngeih faen baenz seiq. Yienghneix cij maj ndaej vaiq, maj ndaej ndei.

Gunghyez vafeiz, cawz soemj、ndaengq、vafeiz le, lij aeu daj gij saehsaed Guengjsae okfat, cungfaen leihyungh youzcoengh、dangzrwi、ciuj- cingh、youzsoengciet、rindienh daengj swhyenz dieg raeuz, daihlig mbefat gij iengfaex habcingz caeuq raemxyungz doxgyaux. Leihyungh gij bienliuh duenhliuh moegcaiz gih raeuz, bae cauh gij cenhveiz vunzcauh giengzlig. Haujlai doxgaiq senhcin cungj caeuq vagungh cigsoh doxnangq, gwn daenj yungh goj caeuq vagungh miz gvenhaeh. Doiq gij doxgaiq neix, aeu baij vunz bae haglienh, cingj vunz daeuj sonyinx, caeuq vunzde doxgap guh.(caengz sat)