“Dingzci aenvih mbawraeu haemh, mbawraeu hoengz gvaq va ndwenngeih.” Daeglwg mwh lij doeg siujyoz couh ciengzseiz nam daengz hot sei neix. Geij bi gvaqdaeuj, baez daengz seizdoeng, gou cungj maq- muengh ndaej bae ‘Diegmbanj Maxdaemq’—Dwzbauj yawjngonz mbawraeu hoengz. Aenvih roen bae gizde gig yak byaij, neix hawj gou bi gvaq bi cungj dwg naemj ndwi.

“Seizneix Dwzbauj doeng gauh- suz goengloh lo, mwngz miz maz leixyouz mbouj daeuj gizneix? Ngoenzyenzdan gou youq neix cinjbei laeujaekez caj mwngz nw!” Diuz saenqsik neix dwg daegyoux youq Dwzbauj fat daeuj, baezneix gou gietdingh bae lo.

Yenzdan haetde, gij ci daj Baksaek bae Dwzbauj、Cingsih baihde gig lai,caengz daengz aen cungdaeuz dou couh hai ci daengz yienhsingz Dwzbauj. Daegyoux caeux couh youq gyaeujgai demq gou, de dwg vunz bonjdieg gig sug diegneix, naeuz Bahdouz Yangh gizde goraeu cix lai, dwg dieg gingj ndei yawjngonz mbawraeu hoengz ndeu. Yienghneix dou cigciep haici gvaq baih Bahdouz bae.

Dwzbauj dwg dieg sizmozva mizmingz Guengjsae raeuz, aeu coenz ‘Caet faen rinbya sam faen namh- daeuj beij de mbouj gvaqbouh. Daj yienhsingz bae Bahdouz Yangh, doengh gij da raen dingzlai dwg rinbya, nanz mbouj nanz cix miz ndoinamh cab youq ndawde. Daegyoux naeuz dieg Dwzbauj miz aen yienhsiengq neix: Dieg lawz miz ndoinamh diegde couh maj miz go faexraeu; gyawz miz goraeu daengz seizdoeng cungj dwg yiengh gingj ndeiyawj ndeu. Yienznaeuz riengz roen bae ndoinamh gig noix, hoeng goraeu mbangj go dog、mbangj baenz caz hoengzfwdfwd gig yienj da vunz, yawjraen gijneix, ndawsim gyoengqdou cwxcaih dangqmaz.

Yaek daengz banringz, saek- hoengz gwnz ndoi yied daeuj yied lai, ci heux roengz aenlingq doekbyongh couh daengz Mbanjbahdouz lo. Daengz gizde gou cix rox, Mbanjbahdouz gaenq guh ndei gak yiengh gihcuj sezsih angqcoux hek daeuj: Miz ciengzdingzci、 miz diengzyietliengz; gangj daengz gijgwn engq lai lo, vunzmbanj youq henzroen baij gai lwgmaenz、haeuxyangz、oijmoiz doengh gijgwn nei. Ndaw ciengzdingzci gaenq dingz rim ciiq, siengj mbouj daengz gyoengqde beij dou daengz ndaej caeux.

Mbanjbahdouz dwg youq dieg gyanggumz, liz Yanghcwngfuj lij gek song goengq bya, aenmbanj seiqhenz cungj dwg ndoinamh. Daegyoux gangj ndaej deng ha! Gizneix dauqcawq maj miz goraeu: Henz rij、dingj bya、 henz dat、laeng mbanj fanzdwg mwngz da ndaej yawjraen cungj miz saekhoengz.

Ndwn youq henz roen hop yawj seiq henz, roxnyinh swhgeij ngaiz saekhoengz homh dwk, danghnaeuz gwnz ndang mbouj dwg daenj buhyijyungz, ndwn youq gyang yiengh gingj neix, mwngz itdingh danq Ciuhdangz Dumuz coenz “mbawraeu hoengz gvaq va ndwenngeih” sij ndaej gig ndei ha!

Sing angqriu bouxyoux baenz raq baenz raq daj seiqhenz cienz daeuj, dingq ndaej ok gyoengqde cungj dwg danqhaenh gij mbawraeu hoengz diegneix. Gou caeuq daegyoux byaij hwnj laeng mbanj. Mwngz yawj, gij mbawloenq faexraeu lah laj goek haenx hix dwg lingh yiengh gingj ndeu, gyoengqde bienqbaenz fan ‘didanj’ hoengzfwdfwd ndeu buq gwnznamh hawj hekyouz byaij gvaq gwnz ne. Engq hawj mwngz geizheih dwg, gij saek hoengz mbawraeu miz lai yiengh: Mbangj dwg hoengzmaeq、 mbangj dwg hoengzhenj、 mbangj dwg hoengz- gyieng. Lij dwg daegyoux daezsingj gou cix rox, cauxbaenz lai yiengh saek dwg faexraeu gizneix miz goraeu mbawsamgak、 goraeu mbawhajgak、goraeu yienghnyaujgaeq, mbawraeu mbouj doengz yiengh saek couh mbouj doengz lo.

Ndwn diegsang yawj coh seiq- henz, mbawraeu hoengz mbangj lumj bogfeiz、 mbangj lumj mbawgeiz, gyoengqde nyumx hoengz daengx ndoi daengx nangh, hawj seiznit luegbya daiq daeuj yiengh moqsak raeujrub ndeu. Rumznit ci daeujfifi, ciengzseiz miz mbawloenq biu roengz ‘cup’ fajgemj gou. Gou fwngz gip mbawloenq ndeu daeuj caemz, roxnyinh goraeu hawj vunzbiengz soengqdaeuj gig lai: Seizcin daenj geu ‘buhheu’ canggyaeu lajbiengz, vanzlij hawj vunzmbanj dawz daeuj nyumx guh haeuxnaengj; seizneix goraeu youh nyumx hoengz byandoi, hawj luegbya daiq daeuj yiengh moqsak; couhcinj mbawraeu saet bae sengmingh, hoeng de gig vaiq bienqbaenz namhcin, caiq oem dauq lajdeih. Gwqhaenx gou youh siengj daengz, hot go 《Gij Cingz Mbawmbaw Mbawraeu》ndaej daj Yanghgangj riuzciengq daengz Daluz, dwg mbawraeu hoengz hawj boux- mbauq lwgsau mwh damzyoux daiqdaeuj lai yiengh siengjmuengh.

Daegyoux doq yiengq gou gangj gij mbawraeu doq yiengq gou lwnhnaeuz, gaxgonq Dwzbauj hawj vunz yaenqsiengq dwg “gungzhoj” “youq gemh rin ra gwn”, daj aen giyez Vazyinzlij roengz ngaenz 110 ik haenx youq neix laebguh, ndawsingz lajmbanj bienqvaq vaiqvwd, bi 2014 caizcwng souhaeuj mauhgvaq 8 ik maenz. Dwg ha! Gaxgonq gwn mbouj imq daenj caengz raeuj, byawz miz sim bae yawjngonz mbawraeu ne, gij mbawraeu hoengzoq neix youh daengq raeuz rox, seizneix saedceij beksingq Dwzdauj lumj mbawraeu nei bienq ndaej hoengzfwdfwd lo.

Daengngoenz ciemhciemh doek baihsae, dou mbouj rox mbouj nyinh byaij daengz dingjbya. Gwqhaenx mbawraeu hoengz caeuq fwjhaemh doxdaengh gyaebbaenz fuk vehgyaeu ndeu louz hawj Mbanjbahdouz. Yawj daengz gij gingjhaemh dangqnaj neix, gou geiq ndaej miz vunz yienghneix danq goraeu Dwzbauj: Aenvih lajnamh dieg Dwzbauj damq miz 3.2 ik dun lijdujgvang, caemnhcaiq Baksaek dwg dieg lwed doenghboux gwzmingz lezsw rwed gvaq ndeu, mbawraeu Dwzbauj daegbieg hoengzoq, hoengz ndaej hawj vunz nyaenx mbouj ndaej lizhai.

Doxdauq ci hai gvaq henz dieg gihdi Vazyinzlij, raen geij diuz yenhdungh sanggywggywg haenx hoenzhau mauh mbouj dingz, youh siengj daengz diuz dietloh ngamq doeng haenx, gou guj ngoenzlaeng mbawraeu hoengz Dwzbauj engq gyaeundei maez vunz.