Daj laebdoeng hainduj, ginggvaq siujsiet、daihsiet、doengceiq、siujhanz、daihhanz, cigdaengz ngoenz laebcin gaxgonq cungj suenq dwg seizdoeng.

Seizdoeng mbwn nityuyu, ndang vunz sup haeuj caeuq baiz ok gemjmenh, yienznaeuz ndaej rom rengzndang, danhseih rengz dingj bingh cix doekdaemq lo. Ciuq mizgven soqgawq dungjgi ndaej rox, aen geiqciet neix lajbiengz dingzlai digih vunz sim miz bingh uk miz bingh sailwed miz bingh caeuq huhgizdau baenzbingh ceiq lai, dai hix ceiq lai.

Cunghyih nyinhnaeuz, seizdoeng fanh faed ndoj youq, swyenzgai yaem hoengh yiengz nyieg, gak cungj doihduz caeuq doenghgo cungj ndojhai heiqyiengz caj seizcin daeuj daengz. Ndigah, seizdoeng ciengx ndang aeu naek yo yaem hoh yiengz. Caenhliengh ninz caeux hwnq gvaiz, baujciz yietnaiq seizgan gaeuq, hawj eiqceiq caemcingx, heiqyiengz ndang vunz mbouj deng gauxca; genhciz habdangq lienhndang, lienhndang le gibseiz uet hanh hawq; haeujsim raeblaeng bauj raeuj, bouxlaux、lwgnyez caeuq boux ndang hawnyieg engq aeu haeujsim dingj nit bauj raeuj.

Seizdoeng dwg aen geiqciet ndei gwn bouj ndeu, danhseih gwn bouj aeu swnh de swhyienz, haeujsim ciengx heiqyiengz. Seizdoeng aeu lai gwn di gijgwn raeuj ndat ndeu, yienghneix cij ndaej hawj aenndang lai dingj ndaej nit. Nohma caeuq nohyiengz ceiq hab bouxlaux gwn bouj. Linghvaih, Haetnaengz hwnqmbonq le aeu gwn boi laeujyinzsinh iq ndeu, yienghneix ndaej re rumz dingj nit、vued lwed. Ronq nohvaiz baenz gaiq iq, gya di laeujhenj、coeng、hing ndeu dwk gumeng aeuq naemz gwn dang caeuq noh, ndaej ik heiq gaij hozhawq、nyinh ciengx aendungx.