Seizdoeng aenvih deng nitgyoet gig dwk, ndang vunz cizvuz sinzgingh goengnaengz fatseng luenhlab, dungx- saej noddoengh cingqciengz gvilwd deng nyauxluenh, veibing yungzheih fukfat. Baihlaj geij meih dangndei doiq boux dungx miz bingh haenx miz fuengzceih cozyung.

Dang nohmaknganx makcauj maenzcienz. Aeu 12 aen makcauj nding, daih’iek 300 gwz maenzcienz, song geng nohmaknganx, dangzsa byongh cenj. Sien cimq makcauj nding unq, dat naeng maenzcienz cab baenz naed le itheij dwk rek gya raemx coemh goenj cawj daengz unq cug, caiq dwk nohmaknganx caeuq dangzsa diuzfeih, caj nohmaknganx sanqhai couh ndaep feiz daek hwnj gwn. Maenzcienz ndaej bouj mamx huz dungx; nohmaknganx、makcauj nding ndaej ik heiq lwed、cangq dungx.

Dang lauxbaeg nohyiengz. Aeu 750 gwz noh naengdungx duzyiengz, 500 gwz lauxbaeg hau, byaekhom、gyu、gihcingh、liuhlaeuj、coeng、hing、mwnh hozceu gak di ndeu. Swiq nohdungx duzyiengz seuq ronq baenz sei, lauxbaeg hau swiq seuq caemh- caiq ronq baenz sei. Dwk youz roengz rek, dwk hinggep cauj hom le ndingq raemxgoenj roengz, caiq dwk gyu、gihcingh、liuhlaeuj、mwnh hozceu diuzfeih, raemx goenj le sien dwk nohdungx duzyiengz cawj cug, doeklaeng caiq dwk lauxbaeg hau gaij yungh feiznumq cawj cug le dwk coeng caeuq byaekhom daek hwnj gwn. Cungj dang neix ndaej bouj ndaw ik heiq, raeuj dungx sanq caep.

Dang sijsu makcauj hing. Aeu mbaw gosijsu ndip 10 gwz, 3 ndaek hing, 15 gwz makcauj nding, sien dwk makcauj nding roengz raemx bae swiq seuq cawz ngveih, cab hing baenz gep, ronq mbaw gosijsu baenz sei le caeuq hinggep、makcauj itheij dwk roengz gumeng bae gya raemxraeuj feizhaenq cawj goenj le gaij yungh feiznumq aeuq 30 faen cung. Doeklaeng vez mbaw gosijsu、hinggep hwnj, laebdaeb yungh feiznumq caiq aeuq 15 faen cung le daek hwnj gwn. Cungj dang neix ndaej raeuj dungx sanq caep、hengz heiq bang siuvaq.

Dang hozceu dungxmou. Aeu 30 daengz 50 naed hozceu hau, aen dungxmou ndeu, gyu、liuhlaeuj、veicingh gak di ndeu. Sien swiq dungxmou seuq ronq baenz gaiq roxnaeuz sei le dwk rek gya raemx dwk hozceu aeuq 2 diemj cung baedauq, dang gwd dungxmou naemz le dwk gyu、liuhlaeuj、veicingh diuzfeih, caengz gwn haeux gaxgonq gwn. Hozceu singq raeujndat, ndaej raeuj ndaw sanq caep; dungxmou ndaej cangq dungx ciengx dungx.