Genhciz dangj guhdaeuz

Saedceij raeuz hoengzoq

Yaek saedyienh aen loq

Byaij diuz loh fouqgiengz

yienghyiengh hengz minzcuj

Gaiqgaiq duj doxyaeng

Bouxdog gangj mbouj baenz

Caez yaeng ndei guhsaeh

Mbouj hengzyak hengzmanz

Mbouj guh vang guh raeh

Caez haeujsim haeujeiq

Guhsaeh gangj vwnzmingz

Huzndei guek maenh’ak

Mbwn lak cungj mbouj lau

Suijniz sa doxndau

Giet baenz gau maenhgenq

Loh gvangq nyaemh byaij ci

Namh biz ndei ndaem byaek

Vunz baihnamz baihbaek

Yaek gvaq ngoenz swyouz

Rap bwnh coq nazgyaj

Gogo maj doengzcaez

Cungguek aen biengz ndei

Bouxboux gyaez bingzdaengj

Vaiz miz duz byom biz

Loh miz hwnjroengz lingq

Boux banhsaeh goengcingq

Ndaej vunz gingq vunz gyaez

Cawj ngaiz gauq aen moj

Buhmoq baengh cik caiz

Fapceih guek ndei lai

Vunz baenz gvai baenz sienh

Raeuz gyaez guekcoj ndei

Seiqseiz bonghyatyat

Ginghci daih hwngfat

Raeuz simndat guhhong

Gingqnieb sim cix angq

Bouxboux gangj naeuz ndei

Gag hong gag ndiepgyaez

Roengzrengz bae haenqguh

Lauxsaed sim cix gyaeu

Mbouj naeuz it guh ngeih

Yaeuh vunz yaeuh swhgeij

Gangj haeujceij cij baenz

Ciengzseiz boux bang boux

Doxndei daeuj guh vunz

Caezcaez guh ndaej gwn

Daengxbiengz vunz huzsienh