（ciep geiz gonq）

Dang gyoengqvunz yungh ceij- gaen yied daeuj yied lai seiz, gaxgonq yungh gij soujgaen haenx couh menhmenh daj ndaw saedceij gyoengqvunz siusaet bae lo. Ceijgaen baenz le cungj doxgaiq gyoengqvunz raeuz cungj noix mbouj ndaej ndeu. Lumj mwh gwn haeux, gwnz daizhaeux cungj baij miz ceijgaen, hawj vunz gwn haeux le uet fwngz uet bak, baez uet liux swnh fwngz gveng coh ndaw swx nyapnyaj bae, gawq fuengbienh boux yungh ceijgaen, youh fuengbienh boux baet ranz.

Yienznaeuz ceijgaen hawj gyoengqvunz raeuz daiq daeuj fueng- bienh gig lai, hoeng, ceijgaen hix hawj gyoengqvunz raeuz daiq daeuj vwndiz gig lai. Lumjnaeuz, seizneix raeuz byaij youq gwnzgai roxnaeuz gwnz loh, ciengzseiz yawjraen song henz gai roxnaeuz song henz loh dauqcawq miz vunz gveng gij ceijgaen gaenq yungh gvaq haenx, daegbied dwg gawjhengz gijmaz hozdung, giz miz vunz comzyouq lai haenx, cungj gveng miz ceijgaen uq haenx, mwngz baez mbouj siujsim, lajdin couh dieb miz gij ceijgaen uq gig dwgdaengz haenx. Ndigah, ceijgaen daiq hawj raeuz fuengbienh seiz, hix daiq mazfanz hawj raeuz gig lai.

Caiq gangj, danghnaeuz daj mbaetyungh nwngzyenz daeuj yawj, ceijgaen sai bae nwngzyenz gyoengq- vunz raeuz hix gig lai. Gyoengqraeuz cungj rox, ceij dwg yungh yiengfaex guh baenz, raeuz ngoenzngoenz yungh ceijgaen, danghnaeuz moix boux vunz moix ngoenz yungh bau ceijgaen ndeu, daengx guek raeuz cibsam ik vunz aeu yungh cibsam ik bau ceijgaen, mbouj rox yungh bae geijlai gofaex lo. Daengx bi sam bak loegcib haj ngoenz, couh mbouj rox yungh bae geijlai gofaex lo. Bi bae bi daeuj, gofaex gwnz digiuz raeuz lijmiz geijlai hawj raeuz yungh ne? Danghnaeuz daengz seizhaenx, gwnzbya gwnzbo cungj ndoqndangndang bae, raeuz naengz siengj ndaej daengz gwnzbiengz raeuz baenzlawz cingzgingj lwi?

Vihneix, raeuz miz haujlai lijyouz bae dauqngeix soujgaen. Danghnaeuz raeuz daj mbaet yungh nwngzyenz bae ngeix, raeuz wnggai yungh soujgaen, danghnaeuz raeuz daj hag baenz veiswngh sibgven daeuj gangj, raeuz wnggai yungh soujgaen, danghnaeuz raeuz simlangh saekdi, raeuz wnggai yungh soujgaen. Soujgaen dwg ndaw ndwenngoenz gyoengqvunz raeuz cungj liz mbouj ndaej. Raeuz mbouj naengz yienghyiengh cungj siengj yiengjsouh, yienghyiengh cungj siengj fuengbienh couh dawz gij doxgaiq gaxgonq riuzhengz roengzdaeuj haenx gveng okbae, ceijgaen yienznaeuz ndei yungh, yienznaeuz yungh ndaej fuengbienh, hoeng ceijgaen dingj mbouj ndaej soujgaen, aenvih ceijgaen mbouj hawj gyoengqvunz raeuz daiq daeuj simlangh vuenyungz.

(sat)