Seizdoeng, haujlai vunz heiqlwed mbouj gaeuq, mehmbwk heiqlwed noix couh engq mbouj ndei lo, ndigah, mehmbwk youq seizdoeng gwnbouj gvanhgen wng naek youq bouj lwed fuengmienh. Mehmbwk heiqlwed mbouj gaeuq, saeknaj gig yakyawj, lij yungzheih yaeuhfat baenz binghfugoh dem.

Bouj lwed ciengx lwed, ndaej habdangq gwn di byaekbohcai、duhndaem、lauxbaeg nding、raetgimcim、ngaeux、raetmoegngaex、nohgaeq、nohmou、nohyiengz、haijsinh daengj; lij ndaej senj gwn di makit、makcauj nding、noih maknganx he, doengzseiz giethab cunghyoz bae gwnbouj dem, lumj ahgyauh daengj.

Ciuq conhgyah gaisau naeuz, ahgyauh feih diemz bingz, gawq ndaej ywbingh, youh ndaej baujgen, deng haenh guh yw ndei bouj lwed, ceiq hab mehmbwk gwn, bouxsai hix gwn ndaej, doiq boux baenz yaem haw、boux lwedhaw ceihyw yaugoj gig ndei, caemhcaiq ndaej nyangq nyinz cangq ndok, giem miz meijyungz、ciengx naengnoh dem. Ndaw ahgyauh hamz miz 18 cungj anhgihsonh caeuq diet、doengz、gai、mungj daengj 20 lai cungj veizlieng yenzsu, ndaej gaijndei lwed caeuq gai doxdaengh, coi hungzsibauh habbaenz. Linghvaih, ahgyauh lij ndaej fuengz lwed noix maezgae, deng haenh guh gij huqbouj gauhgiz yingzyangj doxgaiq.