Nohyiengz dwg cungj huq- bouj ndei dingj nit ndeu, danhseih de diemzraeuj cix ndat lai, gwn le rox hwnjhuj. Aenvih de miz cungj haeuhauz ndeu, mbangj vunz mbouj haengj gwn, siengj siucawz haeuhauz, cijmiz “doiq bingh roengz yw”, gwn de cij mbouj haeuhauz.

Seizdoeng ciengz gwn noh- yiengz ndaej coicaenh siuvaq, baujhoh bangx dungx, coihbouj nemmuek aendungx, caemh ndaej dingj nyieglaux.

Bouxlaux caeuq boux ndang haw dungx caep, seizdoeng wng lai gwn di nohyiengz ndeu, yienghneix ndaej dingj nit, caemhcaiq doiq boux baenz feigezhwz、boux hozgyawh in、boux baenz ae’ngab、mehsenglwg le heiqlwed haw、boux hwet naet gyaeujhoq naiq caeuq sojmiz binghhawcaep caemh miz ndeicawq.

Gizsaed, 1 goeng- gaen nohyiengz dwk 10 gwz ganhcauj caeuq di laeuj、hing he itheij cawj, gawq ndaej siu haeuhauz, youh ndaej baujciz gij meih nohyiengz.

Cujyau yungh liuh: 500 gwz noh- yiengz, 250 gwz maenz- cienz, 150 gwz lwgcid, 100 gwz lauxbaeg nding.

Boiqliuh: Hoh oij ndeu, 50 gwz hing, 10 gwz byaekhom, dug byaekginzcai he, 2 geng iq gyu, di veicingh ndeu.

Guhfap:

1、Dwk raemx swiq nohyiengz seuq.

2、Gij boiqliuh dat naeng swiq seuq ronq ndei.

3、Dwk nohyiengz roengz gumeng, gya 1.5 swngh raemx, aeuq naemz le gip oij、hing caeuq byaekhom hwnj.

4、Dat naeng maenzcienz ronq baenz gaiq le dwk roengz raemxgyu bae cimq.

5、Dwk lwgcid、 lauxbaeg nding、maenzcienz roengz rek aeuq cug, gya diuzliuh couh baenz gwn.