Geij bi neix daeuj, Gveigangj Si Mungzgungh Yangh Minzcuz Cunghyoz yawjnaek hong hagdangz minzcuz vwnzva gensez, dawz gij hong hagdangz minzcuz vwnzva gensez dangguh gij hong ngoennaengz aeu guh haenx. Daegbied dwg gvaq bineix daeuj, Mungzgungh Minzcungh ndaej dingh guh yienghndei swcigih minzcuz vwnzva gyauyuz hagdangz le, Mungzgungh Minzcungh sij ndaej ok ngaenz hung caeuq rengz hung, gyahung hagdangz minzcuz vwnzva gensez ligdoh. Daengz seizneix dauq, Mungzgungh Minzcungh gaenq ok 36 fanh maenz ngaenz guhbaenz aen yauveih miz minzcuz daegsaek ndeu、diuz vwnzva cangzlangz miz 48 mij raez ndeu、aen dieg baijcuengq doxgaiq hongdawz vwnzva ndawbiengz Bouxcuengh ndeu、aen ranz baijcuengq doxgaiq vwnzva ndawbiengz Boux- cuengh ndeu. Doenggvaq okbanj doenghgij minzcuz vwnzva cihsiz, baijcuengq doenghgij doxgaiq hong- dawz caeuq doxgaiq swnghhoz vwnzva ndawbiengz Bouxcuengh doenghyiengh hong neix, youq ndaw hagdangz cauxguh caeuq hwnghwnj gij heiqfaenh minzcuz vwnzva lai raeuh, ndaej daengz baihgwnz lingjdauj haenhndei. 2014 nienz 12 nyied 5 hauh, Swcigih Gyauyuzdingh Yivu Gyauyuz Ginhhwngz Fazcanj Duzdauj Bingzguj Lingjdauj Siujcuj daengz aen hagdangz neix genjcaz seiz, couh haenh Mungzgungh Minzcungh banhhag miz minzcuz daegsaek, hagdangz vanzging gyaeundei, sezsih caezcienz, aeundaej cingzcik yienhda.

Vih guh ndei gij hong hagdangz minzcuz vwnzva gensez, daengx hagdangz hagseng lauxsae caez ok geiq ok rengz, gij guhfap gyoengqde miz lajneix geij fuengmienh:

Lai yiengq lingjdauj veibau guh hong cingzgvang, ceng’aeu lingjdauj daemxcengj gij hong hagdangz minzcuz vwnzva gensez. Bi’gvaq Swcigih Gyauyuzdingh bued hawj Mungzgungh Minzcungh 20 fanh maenz ngaenzcienhangh hagdangz minzcuz vwnzva daeuj gensez minzcuz vwnzva cangzlangz.

Lai caeuq doenghboux giyezgyah miz ngaenz haenx lienzhaeh, ceng’aeu gyoengqde daemxcengj gij hong minzcuz vwnzva gensez hagdangz. Gvaq bineix daeuj, hagdangz ndaej daengz Luz Gozgoz、Banz Swjfungh daengj doenghboux giyezgyah vunz Mungzgungh bangcoh, sien demh cienz 20 lai fanh maenz bang hagdangz guh baenz aen dieg caeuq aen ranz baijcuengq doxgaiq vwnzva ndawbiengz Boux- cuengh, youh hawj hagdangz gien 2 fanh lai maenz.

Lai guh senhconz, ceng’aeu lauxsae、ginzcung dangdieg caeuq bohranz hagseng daemxcengj gij hong minzcuz vwnzva gensez hagdangz. Doenggvaq fatdoengh, ndaej daengz lauxsae、ginzcung dangdieg caeuq bohranz hagseng daemxcengj, gyoengqde gungh hawj hagdangz gien ndij、cae、rauq、doengjfaex、rieng、muhrin、buhvaq baengzranz、haizbaengz daengj doxgaiq 38 cungj 58 aen.