6 nyied 23 hauh, Veiz Gozcingh daeuj daengz Sanghaij. Goengdaeuz Sanghaij Si Cinz Bihyenj、Cauz Dizciuh bang de anbaiz ndei le, youz Vazdungh Yihyen gyoebcomz Sanghaij mizgven conhgyah bang de cienzmienh guh genjcaz.

Ginggvaq conhgyah genjcaz duenhdingh, Veiz Gozcingh gyaeuj ngunh, dwg cungj binghcunghab Meijnizwjsi feihdenjhingz he. Cungj bingh neix bi 1950 hainduj youq ndoengfaex Yeznanz fatbingh. Conh- gyah naeuz, danghnaeuz ngamq fatbingh cix ndaej sikhaek yietnaiq caeuq yawjbingh nei, yauqgoj cix lai ndei lo. Hoeng aenvih seizhaenx hoenx ciengq, mbouj ndaej gipseiz mizyauq ywbingh, caemhcaiq ciengz- geiz mbouj ndaej gozdingh bingh, sojyij gvaqlaeng fanjfuk fatbingh. Seizneix caemh mbouj miz maz yw daegyauq daeuj yw dingz bingh neix, cujyau dwg baengh liuzyangj diuzciet, gwn yw cij miz cozyung bangbouj.

Aen gaiqraemh aenbwt de ne, baizcawz le dwg nok roxnaeuz gezhwz dingz vaizngeiz neix, daihgya cix cuengqsim lo.

Gij sailwed simdaeuz de ne, conhgyah caemh guh le genjcaz, laihnaeuz de miz binghsimdaeuz yinjsingq, hezyaz bienq sang, yaek aeu ciengzgeiz gwn yw.

Saenzging de ciengzgeiz daeuj cungj naiqnuek youqgaenj ne, cij- ndaej habdangq yietnaiq, gwn yw diuzleix.

Gij siengcungq gwnz hwet de youq mwh hungzginh deng haenx, conhgyah nyinhnaeuz, aenvih bak- sieng youh hung youh laeg, daiq gyawj ndoksaen, seizhaenx mbouj miz diuzgienh gig nanz yw ndei, nienzgeij baenzgeq le yaek yingjyangj de ndangdoengh, nanz gungjhwet, seiz- neix mbouj hab caiq haidau, wnggai gingciengz anqmoz, leixliuz.

Genjcaz sat le, ciuq yigen Dauz Cau, lij heuh de laebdaeb liuzyangj. De raiz saenq hawj Gyauz Yaujgvangh caeuq Swcigih Dangjveij naeuz: gij gaiqraemh youq Guengjsae ciuq okdaeuj haenx, mbouj dwg nok, caemh mbouj dwg gezhwz. Ciuq gij gietdingh cunghnanzgiz, yaek youq ndwen 7 ngoenz 11 ok Sanghaij bae Bwzdaihoz liuzyangj duenh ndeu. Danghnaeuz diegnamz cingzgvang gaenjgip, doq dauqbae Guengjsae.

(caengz sat)