Hozfaz bineix cibgouj bi, gaenq mbouj doeg saw lo. Hoeng guh hongnaz dalaep, dajcaep youh mbouj baenz, baenzngoenz bae caeuq gij vunz mbouj sam mbouj seiq haenx doxyaek doxyuk. Bohmeh baenzlawz naeuz de cungj mbouj dingq. Daxboh de maenj heuj naeuz: “Bohmeh gyauq mwngz mbouj ndaej, caj goenggya dawz mwngz bae gyauq suenq lo!” Hozfaz deng ndaq lai le, miz seiz de hix ienqhoij, gag naeuz: “Danghnaeuz miz vunz son gou aen bonjsaeh laeuq ndaej cienz ndeu, gou nyienh baiq de guh lauxsae……”

Hozfaz ciengzseiz gwih cimozdoz ndaw ranz haeujhaeuj okok, ndigah, aen cimozdoz de ciengz deng vaih dawz bae coih, nanz le, geij boux canghcoihci gwnzhaw cungj roxnaj de liux.

Miz ngoenz ndeu banhaemh, Hozfaz hai cimozdoz dap Daegseiq dauq maranz, ci hai ndaej gig vaiq, ma daengz bakhaw, sawqmwh miz aen ci hung ndeu vang gvaq goengloh daeuj. Hozfaz baez raen gipmuengz sabci, van cimozdoz bien loh bae, aenvih hai vaiq lai, cimozdoz de daemj laj hamq henzloh bae lo, songde deng sinz roengz ci bae, ninzgoep youq laj henzloh.

Gvaq ndaej yaep ndeu, Hozfaz caeuq Daegseiq menhmenh ndwn hwnjdaeuj, de aek diuqbubbub, naj bienq heu liux, naeuz:“Caeklaiq goeng raeuz baujyouh bw, laemx youq gwnz doi fiengz daeuj, mboujnex, raeuz couh bae mbanjlaj guh fangz lo.” Songde dawz ci geuh hwnjdaeuj, yawj le naeuz:“Ci mbouj vaih geijlai, lij coih ndaej.” Hozfaz songvunz gaex ci bae aen diemq ndeu coih, raen boux saefouh ndaw diemq haenx ngeihcib bi baedauq, daenj dauq buhbing ndeu, naj gig seng. Saefouh cam rox cingzgvang le, naeuz: “Sou ha, gaej dawz sengmingh daeuj guhcaemz bw. Gou yawj aen ci neix gaenq coih geij mbat lo, seizneix aeu coih ndei, ceiq siuj aeu diemj cung ndeu. Mbwn yaek laep lo, mboujnex, ngoenzcog sou menh daeuj aeu ci. Daeuj, caeuq gou gwn haemh gonq.” Hozfaz songvunz najmong songfaenh, couh caeuq saefouh gwn haeux lo.

Gwn haemh gvaq le, Hozfaz bae gwnz haw cienq diemj lai cung cij dauqranz, de dajcaemx ndei haeuj ndaw ding daeuj. Bohmeh de boux dawz diuzbien caeux couh youq ndaw ding caj de lo. Boh de hat naeuz: “Gvih roengzdaeuj, lwgfangz mwngz, youh bae gizlawz caeg ndaej aen cimozdoz moq caeuq aen lwnzdaih moq ma?” Hozfaz baez dingq doeksaet liux, naj bienq lo,lauxlaux saedsaed gvih roengzdaeuj. De rox, mboujguenj maj ndaej baenzlawz hung, youq ndaw da bohmeh, de cungj dwg laeq nyez iq ndeu. De naeuz:“Ci neix mbouj dwg cicaeg, dwg ci bouxcoihci. Dou dawz ci bae coih, de caengz coih ndaej ndei, couh heuh gou gwih ci de ma, ngoenzcog gou gwih ci bae vuenh……” “Miz nyaenx ndei gangj? De youh mbouj roxnaj sou, sam bi lwgnyez hix mbouj saenq! “Daxboh, gou gangj gijvah neix dwg caen, mwngz mbouj saenq, bae heuh Daegseiq daeuj cam couh rox lo, haxbaenh gou doz de dauq……” Daxmeh Hozfaz sikhaek bae heuh Daegseiq.Yaep he, Daegseiq daeuj lo, baez raen Hozfaz deng gvih, de hix gvih roengzdaeuj, naeuz: “Bohlungz, Hozfaz dwg gangjcaen. Boux saefouh haenx sim gig ndei, de hawj dou gwn haeux, hix mbouj lau dou yaeuh de. Gou naeuz lwnzdaih ci gou vaih lo, gwnz ndang youh mbouj miz cienz, de couh hawj aen lwnzdaih moq ndeu hawj gou, naeuz coih ci ndei le, gvaqlaeng cij dawz cienz bae hawj de, caen dahraix……” Daxboh Hozfaz naeuz:“Fangz couh saenq sou yaeuh. Ngamj lai lo, sou geij lwgcod neix doxyuk guh saehvaih, haemhneix sou couh gvih youq gizneix…….”

“Bajliuz, neix dwg ranz Hozfaz lwi?” Cingq youq seizneix, sawqmwh miz daegcoz daenj buhbing ndeu gwih cimozdoz daeuj daengz baihnaj bakdou dingz roengzdaeuj cam daxmeh Hozfaz. Boh Hozfaz ndaej nyi sing ci couh gvaqdaeuj yawj. Daeg coz haenx byaij haeuj ndaw ding daeuj, raen Hozfaz caeuq Daegseiq ngaiz gvih, cam rox cingzgvang le, de gipmuengz naeuz:“Daxau, mbouj ndaej ndaq songde, songde gangj dwgcaen, gou cam vunzwnq rox cingzgvang songde lo, lau songde dauqma deng sou ndaq, coih ci sou ndei le, gou couh gwih daeuj neix lo. Song daegnuengx vaiq hwnjdaeuj, dwg gou haih sou lo……” Song gvanbaz raen yienghneix, ndwn youq laj daeng mwnh lo.

Hozfaz caeuq Daegseiq ndwn hwnjdaeuj gaem fwngz saefouh naeuz: “Docih mwngz, neix dou hawj cienz coihci caeuq cienz lwnzdaih hawj mwngz……”

Hozfaz songde soengq saefouh bae ma, daengz gyaeujmbanj, samde sij mbouj ndaej doxbiek, saefouh gaem fwngz songde naeuz:“Gou raen gij siengq sou miz caixhangz, mboujnex, ngoenzcog sou bae diemq gou hag coih ci? Gou mbouj aeu cienzhag. Raeuz majhung lo, dinfwngz youh ndei, gaej hawj bouxlaux ciengx lo, daengz dingz nienzgeij neix, wnggai mbouj yungh bohmeh causim baenzlai lo. Raeuz nienzgeij ca mbouj geij lai, gou baengh aen diemq neix ndaej ciengx ranzvunz lo.” “Daeggo, mwngz gangj ndaej deng, beij mwngz hwnjdaeuj, dou yaez lai lo. Ngoenzcog dou couh bae caeuq mwngz hag coih ci…… !” Hozfaz naeuz.

“Ndei, ngoenzcog sou couh daeuj ba!” Saefouh naeuz.

Ngoenzdaihngeih, Hozfaz caeuq Daegseiq guhdoih bae caeuq saefouh haenx hag coihci lo. Saefouh nyinh- caen son, songde yunghsim hag. Gvaq ndaej song bi, Hoz faz caeuq Daegseiq bonjsaeh coih ci ak lo, couh gak boux hai aen diemq coih ci ndeu, seng’eiq gig hoengh. Youh gvaq geij bi, songde hix aeu ndaej yah lo. Songde ciengxlwenx geiq maenh vah saefouh: “Bang ndaej couh bang, gaej dam cienzcaiz, caenhliengh coih ndei ci vunz.”

Gyoengq vunzmbanj cungj naeuz, Hozfaz caeuq Daegseiq dwg deng hux ndaej fuk, songde baez hag couh rox, danghnaeuz mbouj hag bonjsaeh, caen vuengjfeiq dwg bouxcoz ha.