Swcigih Minzyijveij Ciuhai Aen Hoih Hong Gvangjsih Vahcuengh Sawcuengh Suijbingz Gaujsi Sawqdiemj Cungjgez Bingzguj

Bonjbauq siusik (gicej Veiz Yennaz/韦愿娜) 12 nyied 11 hauh, Swcigih Minzyijveij youq Hwngzyen ciuhai Aen Hoih Hong Gvangjsih Vahcuengh Sawcuengh Suijbingz Gaujsi Sawqdiemj Cungjgez Bingzguj. Swcigih Minzyijveij fucujyin Yangz Gijbyauh youq gwnz hoih hopngomx gvancez lozsiz gij cingsaenz youqgaenj Cunghyangh caeuq Daengx Gih Hoih Hong Minzcuz, giethab hong Vahcuengh Sawcuengh suijbingz gaujsi sawqdiemj saedcaeq, cungjgez gih raeuz daj 2012 nienz guh Vahcuengh Sawcuengh suijbingz gaujsi sawqdiemj daeuj caeuq ndaej gij cingzcik nem gingniemh, haeujlaeg faensik le gij hingzsi caeuq yinvu dangqnaj hong Vahcuengh Sawcuengh suijbingz gaujsi bungz- daengz haenx, doengzseiz doiq bi 2015 hong Vahcuengh Sawcuengh suijbingz gaujsi guh le anbaiz.

Aen hoih neix nyinhcaen gvancez le gij cingsaenz youqgaenj Cungh- yangh caeuq Daengx Gih Hoih Hong Minzcuz caeuq《Gij Yigen Cunghgung Cunghyangh Gozvuyen Gvendaengz Gyagiengz Caeuq Gaijcaenh Youq Baihlaj Hingzsi Moq Hong Minzcuz Haenx》, yenzgiu busuj bi 2015 hong Vahcuengh Sawcuengh suijbingz gaujsi. Cunghgoz Minzcuz Yijvwnz Fanhyizgiz、Swcigih Gyauyuzdingh、Swcigih Minzyijveij、gak si minzyijveij mizgven bumwnz boux lingjdauj, gih raeuz boux lauxhangz Sawcuengh、boux gaujseng daibyauj gungh 50 vunz camgya. Youq gwnz hoih, Swcigh Minzyijveij doengbauq le hong Gvangjsih Vahcuengh Sawcuengh suijbingz gaujsi sawqdiemj gihbwnj cingzgvang, Nanzningz Si Minzyijveij、Bwzswz Si Minzyijveij、Cungzcoj Si Minzyijveij faenbied gaisau bonj si guh hong Vahcuengh Sawcuengh suijbingz gaujsi sawqdiemj gingniemh caeuq aeundaej gij cingzcik haenx, gawjlaeh gangjmingz, guh Vahcuengh Sawcuengh suijbingz gaujsi gij cozyung nem miz yiyi haenx. Gyoengq boux lauxhangz、gaujseng daibyauj doiq 2012-2014 nienz gij hong Gvangjsih Vahcuengh Sawcuengh suijbingz gaujsi sam bi sawqdiemj guh le cienzmienh cungjgez caeuq bingzguj, daezok yigen caeuq genyi, vih guh ndei hong Vahcuengh Sawcuengh suijbingz gaujsi ok geiqmaeuz. Gyoengqde nyinhnaeuz, 2012-2014 nienz sam bi hong Vahcuengh Sawcuengh suijbingz gaujsi dabdaengz muzdiz caeuq gunghcoz muzbyauh bonj dingh, vih doidoengh Vahcuengh Sawcuengh suijbingz gaujsi ciengzdaiva comzrom le fungfouq gunghcoz gingniemh, genyi gibseiz doigvangq, cienzmienh buhai.