2014 nienz12 nyied 5 hauh，Gvangjsih Cuengh Gun song vahsaw sonhag yenzdauj hozdung youq Sanglinz Yen gawjbanh. Baez hozdung neix dwg Gvangjsih Gyauyuzdingh Minzgyaucu cujciz，gyoengq boux Cuengh Gun song vahsaw gyauyenz yenz aen yienh haicanj Cuengh Gun song vahsaw gyauyuz sawqniemh (benq baihbaek) haenx、gyoengqboux Sawcuengh guzgan lauxsae aen hagdangz saedhengz ngeihloih mozsi sonhag sawqniemh Cuengh Gun song vahsaw (hamz banyozcenzbanh) haenx camgya aen hozdung neix.

Banhaet，bat lai boux lauxsae daeujdaengz gih Cuengh Gun song vahsaw dieg gyauyuz sifan Sanglinz Yen Dangzhungz Yangh Cunghsinh Yozyau camgya hozdung，yienhciengz gvanhmoz Cuengh Gun song vahsaw gyauyuz ngeihloih mozsi sonhag sifango. Banringzlaj，gyoengq gyauyenzyenz caeuq lauxsae youq Sanglinz Yen Gyauyuz giz guh bingz goq nem Cuengh Gun song vahsaw sonhag yenzdauj, daihgya doiq baenzlawz gaihcanj hong Cuengh Gun song vahsaw gyauyuz ngeihloih mozsi sonhag guh le daujlun gyauhliuz. Swcigih Gyauyuzdingh minzgyaucu cucangj Veiz Lanzmingz youq gwnz hoih hozdung gujli daihgya aeu laebdaeb ciepswnj caeuq fazyangz vwnzva conzdungj Bouxcuengh, vih caux daegsaek Cuengh Gun song vahsaw hagdangz okrengz.