Miz song vunz guhdoih youq henz daemz ep bya, hoeng gij beizheiq songde cix doxca haujlai, boux he mbouj aiq leixlangh bouxwnq, maij gag bouxdog ep bya; lingh boux cix gig ndatsim, gyaez caeuq bouxwnq gyau baengzyoux. Mboujgvaq song boux neix gig rox ep bya, yaepyet cungj ep ndaej geij duz.

Seizneix, cibgeij bouxyouz daeuj daengz henz daemz, yawj songde baenz yungzheih couh ep ndaej bya, hozhaenz raixcaix, hix cawx ganjepbya daeuj sawq caijsoq. Hoeng gyoengqde naengh baenz buenq ngoenz cungj mbouj raen saek duz bya hwnj sep.

Boux maij gyau baengzyoux haenx yawjraen bouxhek ep mbouj ndaej bya, couh naeuz:“Yienghneix ba, gou son sou ep bya, danghnaeuz sou hag rox caemhcaiq ep ndaej bya, ndaej cib duz couh soengq duz he hawj gou, mbouj gaeuq cib duz couh suenq lo.”

Daihgya nyinhnaeuz gig hableix, cungj doengzeiq lo.

Son bang vunz neix le, de youh bae son bang vunz wnq, cungj iugouz ep ndaej cib duz soengq de duz ndeu.

Daj banhaet daengz banhaemh, boux haenx cungj dwg bae son gyoengqvunz ep bya, hoeng de hix mbouj sonjsaet gijmaz, de mboujdanh “ep” ndaej laep bya rimrwgrwg he, caemhcaiq gyau ndaej buek baengz- youx he. Mwh daihgya doxyaeng saehyinx ep bya hoenghhwdhwd seiz, boux gag youq gag ep haenx cix gag mbwq youq henz daemz, gij bya ndaw laep de hix mbouj beij doengzdoih lai.

Lai gyau baengzyoux, ndaej hawj seiqgyaiq mwngz engqgya gvangqlangh. (Sugij hoiz)