11 nyied 23 hauh, Lozcwngz Mulaujcuz Swciyen hai aen daihhoih angqhoh laeb yienh 30 hopbi.

Youq gwnz daihhoih, Daengx Guek Yinzda Minzveij、Guekgya Minzveij cuzhodonz cwngzyenz Vangz Yigez, Swcigih Daibyaujdonz fudonz- cangj、Swcigih fucujsiz Lanz Denhliz, Hozciz Si daibyaujdonz donzcangj、sicangj Hoz Sinhhing faenbied doeg saw angqhoh. Ciuq cam rox, vihliux roengz cienz rengz bangcoengh aen yienh neix guh gij hanghmoeg angqhoh laeb yienh 30 hopbi, Guekgya Minzveij cienmonz bued 50 fanh maenz hawj aen yienh neix fazcanj saehnieb minzcuz, swcigih coengh ok 5336 fanh maenz, Hozciz Si coengh ok 100 fanh maenz. Youq yienhciengz, Swcigih Dangjveij cangzveij、Cwng- fazveij suhgi Vwnh Gajvaz, Swcigih fucujsiz Lanz Denhliz, Gvangjsih Ginhgih fucwngveij Huz Yilinz daibyauj swcigih soengq“aen bingz bauj minzcuz doxgiet”hawj Lozcwngz Mulaujcuz Swciyen.

Daj Lozcwngz Mulaujcuz Swciyen laeb yienh 30 bi daeuj, ndaw yienh minzcuz ginghci nem sevei fazcanj yienhda, vunzlai swnghhoz suijbingz daezsang gig lai. Daengz 2013 nienz daej, daengx yienh gij ginghci cijbyauh daeuz caeuq ngamq laeb yienh seizde doxbeij, cungj gyalai 30 boix doxhwnj. Ndawde, digih swnghcanj cungjciz 36.48 ik maenz, dwg 1983 nienz 49 boix; caizcwng souhaeuj 2.7 ik maenz, dwg 1983 nienz 89.1 boix; nungzminz bingzyaenz moix boux cinghsouhaeuj 4485 maenz, dwg 1983 nienz 46.7 boix. Ndaw doz dwg swcigih soengq“aen bingz bauj minzcuz doxgiet”hawj aen yienh neix.

(Loz Siliz/罗世立 Cuh Yaujlingz/朱晓玲)