Seiz haeuxcaeux cienj haeuj ndaw naz bae guenj, yaek ganq go’gyaj haeuxlaeng haenx, ciuq gij cingsaenz cijsi Veiz Gozcingh, Swcigih Nungzyezdingh iucingj le bang daibyauj vunzguhnaz Cauzsan bae daengz Namzningz doxcomz, doxging haeuxcaeux ganqgyaj、guenjleix dajndaem gij gingniemh caeuq haeuxlaeng ganqgyaj gij yigen. Veiz Gozcingh caeuq Ho Hihmingz、Anh Bingzswngh swnh baez seizndei neix, daibyauj Swcigih Dangjveij caeuq Swcigih Cwngfuj cingzndat angqcoux gij bouxak dajndaem Cauzsan daeuj daengz, caemhcaiq cungsim gyo’mbaiq gyoengqde bang aeu ndaej baenzlai hongndaej.

Veiz Gozcingh doiq gij daibyauj bouxak dajndaem Cauzsan naeuz: “Sou dwgrengz lai lo, dou sam boux daibyauj swcigih daeuj ngonz daihgya, it dwg gyo’mbaiq, ngeih dwg angqhoh. Sou swnghcanj sizcenj, rom ndaej caeuq swnjciep ndaej haujlai gingniemh swnghcanj vunzgonq, dijbauj raixcaix. Sou canghndaemnaz, dinfwngz gvai, gingniemh ndei, guh hong ndaej ndei lailai, dwg gij canghhag caencingq dahraix. Guengjsae lij doeklaeng, gyo’mbaiq sou soengq gij gingniemh ndei neix hawj dou. Vunzguhnaz Guengjsae mboujdanh gingqboiq gij bonjsaeh ak sou, lij haenh gij funggek gungcanjcujyi sou. Sou youq lajmbanj doigvangq dinfwngz senhcin, itdingh ngaiz bungzdeng gak cungj swhsiengj baujsouj. Doiq gij vunz swhsiengj baujsouj haenx, muengh sou yaeng- yaeng son, ndeindei bang, sou guh yienghbanj okdaeuj le, gyoengqde cix rox gaijbienq daidu, riengz gyoengq- sou hag lo.”

Ho Hihmingz、Anh Bingzswngh lij cam le gyoengqde daeuj daengz Guengjsae sibgvenq mbouj sibgvenq, guh hong、gwndaenj miz maz haemzhoj. Gyoengqde naeuz, gyoengqde daengz Guengjsae, gak dieg lingjdauj caeuq vunzlai cungj gig dingjrengz caeuq gvansim gyoengqde, mbouj miz maz gannanz, cibfaen docih gij goengdaeuz swcigih daeuj yawj gyoengqde, gyoengqde laemxsim caeuq daengxcungq vunz dangdieg doengzcaez vihliux Guengjsae ndaej ok engq lai haeux bae roengzrengz.

(caengz sat)