（ciep geizgonq）

Roengzdangz le, gou lwnh gij gojgaeq baihrog hawj gyoengq hagseng dingq: Ndawsingz miz haujlai laeuz sang, deng dot mauh roengzdaeuj le cij ndaej yawjraen dingj, gwnz goengloh ngoenzngoenz miz giceh buet bae buet dauq, ndaw haij gvangqlangh yawj mbouj raen haenz mbouj raen bien……Gyoengq doengzhag cungj dingq ndaej haeujsim lili.

Ngoenzhaenx banhaet, gou dawz saw yaek bae gyausiz hwnjdangz, sawqmwh, sam nienzgaep hagseng Siujsingh roq dou byaij haeuj ndaw fuengz gou daeuj, ndaw fwngz de bungjdawz gaem vamoq angjo ndeu, de naeuz:“Lauxsae, hoh mwngz ngoenzciet vaiqvued! Dou gizneix liz haw gyae lai, mboujmiz laex gijmaz soengq hawj mwngz, gaem vamoq neix dwg dou daj gwnzbya mbaet aeu daeuj, gou daibyauj daengx ban sam cib it boux doengzhag sim’eiq soengq hawj mwngz.” Seizhaenx, gou cij raemqrwnq siengj daengz ngoenzneix dwg ngoenzciet lauxsae. Gou ciep aeu gaem vamoq haenx cuengq youq gwnzdaiz, sikhaek, ndaw aenfuengz iq gou mbin rim heiq va rangrwgrwg, seizneix, aenndaeng gou miz di soemj, raemxda ciuzngvih lo. Youq ngoenz- ciet bonjfaenh sou ndaej yiengh laex gig daegbied neix, gou baenzlawz mbouj gikdoengh ne? Neix dwg gou baez daih’it sou ndaej laex ngoenzciet lauxsae, gij laex hagseng soengq neix ceiq dijbauj. Seizhaenx, gou roxnyinh gou dwg boux lauxsae gwnzbiengz ceiq vuenyungz ndeu, caenhguenj gij laex haenx cij dwg gaem vamoq daj gwnzbya mbaet daeuj ndeu.

Gou mboujmiz leixyouz ienq naeuz ndwenngoenz doiq gou mbouj goengbingz, hix mboujmiz leixyouz caiq ndawsim doeknaiq, engq mboujmiz leixyouz mbouj son ndei bang lwgnyez dwggyaez ndawrungh neix.

Youq ndawrungh sonhag geij bi haenx, dwg bang hagseng ndeigyaez neix buenx gou angqriu, sawj gou mbouj rox gadog, sawj gou mizsim nyinhcaen sonhag, doeklaeng aeundaej cingzcik ndei. Ndaej yienghneix gangj, gizhaenx dwg aen diegcoj daihngeih gou, baeznaengz, gyoengq vunzmbanj swnhheiq dwg- gyaez haenx cungj dongx gou naeuz:“Lauxsae ndei ha, ndaejhoengq bae ranz gou youz nw!” Gaenq geiq mbouj ndaej miz geijlai baez yienghneix: Gyanghaet ninz ndiu hwnqcongz, yawjraen bakdou cuengq miz haeuxdaeq、lwgbieng、byaekheu、makmaenj……

Youq ndaw ndwenngoenz sinhoj haenx, couh suenq gyoengq beix- nuengx ndawmbanj mbouj soengq hawj gij doenghyiengh neix, couh suenq diuzgen sinhoj baenzlawz, gou hix aeu louz roengzdaeuj, couh dwg vihliux gyoengq lwgnyez dwggyaez ndawrungh de!

Gyangngoenz, gou daiq gyoengq hagseng haenx doegsaw, hag sij ngoenzgeiq、guhcaemz duzromh dawz gaeqlwg……daengz haemh vunz ninz caemrwgrwg, duzdaek duznengz youq seiqcawq heuhdikdik, gou couh youq lajdaeng beigo, gaij cozyez, sij faenzcieng……

Gou boux dog youq aen hagdangz haenx sonhag sam bi, doeklaeng baihgwnz diuh gou daengz lingh aen hagdangz sonsaw, gou aeu lizhai aen mbanj iq ndawrungh neix, lizhai gyoengq lwgnyez haet doiq da haemh doiq naj haenx. Ngoenzhaenx, gou yaek lizhai, gyoengq beixnuengx ndawmbanj daeuj lo, gyoengqde naeuz:“Vangz lauxsae ha, vihliux bang lwgnyez ndawrungh neix, mwngz mbouj ngah diuh okbae ndei lwi? Couh suenq dou gouz mwngz lo.” Gyoengq hagseng haenx hix aeng raemxda yaek daej naeuz:“Lauxsae, dou sij mbouj ndaej mwngz ha, mwngz mbouj bae, daengz ngoenzciet lauxsae, dou lij bae gwnzbya mbaet gij va ceiq ronghsien ceiq gyaeundei daeuj soengq hawj mwngz bw, gaej bae lo！” Gou hix mbouj rox guhlawz gangj cijndei, cij naeuz:“Gyoengq doengzhag ha, sou dwg lwggvai, neix dwg baihgwnz anhbaiz, Vangz lauxsae diuh bae le lij miz boux lauxsae engq ndei daeuj son sou, daengzcog ndaejhoengq gou lij dauq yawj sou……” Aensim gou miz di luenh, sij mbouj ndaej gyoengqde, hoengq, doeklaeng gou lij dwg lizhai lo.

Bi’gvaq, gou diuh daengz aen siujyoz yienhsingz sonsaw. Seizneix, cib’it bi gvaqbae lo, aen mbanjiq ndawrungh gyae haenx lij dwg youq gizde, gyoengq hagseng bide gou son haenx, mizmbangj gaenq dayoz bizyez okdaeuj guhhong lo, mizmbangj gaenq baenzgya baenzranz lo. Ngoenzneix, aen ciet lauxsae bineix yaek daengz lo, gou youh siengj hwnj bide gaemva rangrwgrwg gyoengq lwghag gou daj gwnzbya mbaet ndaej soengq hawj gou haenx, siengj hwnj gyoengq hagseng dwggyaez caeuq gyoengq beixnuengx swnhheiq ndawrungh haenx daeuj.

(sat)