Seizcou mbwn hawqsauj sieng bwt aeu noix gwn manh. Seizcou hoengheiq hawqsauj, mbaeqdoh noix, bouxvunz yungzheih okyienh baenz hozhawq、gan ae daengj binghyiengh. Neix dwg aenvih aenmbwn hawqsauj lai sieng bwt cauhbaenz. Ndigah, wng noix gwn coeng、hing、lwgmanh、hozceu. Fuengz manh raeuj dem ndat, aenbwt engqgya hawqsauj.

Bwt sauj sieng daep aeu gwn soemj. Daj cunghyih nguxhangz seng gek daeuj gangj, bwt dwg gvihaeuj gim, daep gvihaeuj faex, gim hoengh naengz gek faex, hawj daep faex deng dieng. Wng habdangq gwn di gijgwn soemj ndeu, aenvih “soemj haeuj daep”, ndaej hawj daep faex hoenghgiengz, fuengz heiqdaep daiq lai sienghaih aen’daep. Danhseih mbouj ndaej gwn gijgwn soemj daiq lai, gwn lai rox gig aendungx, aendungx yungzheih baenz biux naeuh、dungxin daengj bingh, doiq aenndang mbouj ndei.

Gva seizcou vaih dungx siuj gwn huqgyoet. Mbouj noix vunz cungj miz cungj gamjsouh neix, baez mbouj siujsim dungx couh vaih, neix caeuq dienheiq seizcou mizgven. Seizcou mbwn liengz, givwnh doekdaemq, heiqyiengz aendungx mbouj gaeuq, caiq gwn byaek mak gyoet roengzbae, dungx couh engq dingj mbouj ndaej lo.

Habdangq gwn raemx ceiq youqgaenj. Seizhah ok hanh lai wng lai gwn raemx, seizcou geiqciet hawqsauj engq wnggai lai gwn raemx. Danhseih gaej baez dog gwn raemx daiq lai, daihliengh gwn raemx rox hawj dungxsaej demgya fudanh, cijmiz gwn noix gwn lai baez cijndaej hawj hozgyawh dumznyinh.

Ciengx yaem ik heiq dwg gvanhgen. Doiq bouxcungnienz、bouxlaux daeuj gangj, seizcou ceiq youqgaenj dwg ciengx yaem ik heiq. Ciengx yaem couh ndaej fuengz bwt sauj, ik heiq youh ndaej raeuj ciengx heiqbwt. Ndigah, seizcou wng lai gwn maenzcienz、beghab、raetngaenz、daezmou、cehmbu、ngaeux、makleiz、gaeujgij daengj, yawhbienh ancienz doh gvaq seizcou.