Dungzlingj Cin dwg Vujsenh Yen aen yanghcin daihngeih hung. Daengx cin miz 13 aen siujyoz, miz 3400 lai boux hagseng. Daj 2013 nienz haggeiz seizcou hwnj, Dungzlingj Cin 13 aen siujyoz、3 aen gyauyozdenj cienzbouh guh Cuengh Gun song vahsaw sonhag sawqniemh. Seizneix, Vujsenh Yen Dungzlingj Cin daengx cin gak aen hagdangz cungj guh Cuengh Gun song vahsaw sonhag.

Aenvih song vahsaw sonhag mbe’gvangq, Cuengh Gun song vahsaw lauxsae mbouj gaeuq, aen hong beizyin lauxsae bienq ndaej gig gaenj. Bi’gvaq gaenq guh ndei daih’it geiz Cuengh Gun song vahsaw lauxsae beizyinbanh, bineix 10 nyied 31 hauh, Vujsenh Yen youh haibanh daihngeih geiz Cuengh Gun song vahsaw lauxsae beizyinbanh. Baez beizyin neix son minzcuz gyauyuz lijlun、Sawcuengh gihcuj cihsiz、sonfap Cuengh Gun song vahsaw daengj, yawhdingh daengz bimoq 1 nyied daej son sat. Yienh gyauyuzgiz lingjdauj daengq yijyenz vwnzsw gvanjlijguj Siz Caizyij gujcangj youq gwnz haiban denjlij gangjvah. Siz Caizyij doiq beizyinbanh daez le yauhgiuz caeuq maqmuengh. Gaenlaeng, de hawj daihgya hwnj beizyinhbanh dangz goq daih’it, neiyungz dwg 《Minzcuz Gyauyuz Lijlun》.

Camgya aen beizyinbanh neix miz 28 boux lauxsae, gyoengqde daj daengx cin gak aen siujyoz、gyauyozdenj daeuj, dingzlai lauxsae nienzgeij 40 bi doxhwnj lo, yienznaeuz nienzgeij hung di, hoeng, bouxboux cungj gangjnaeuz aeu nyinhcaen hagsib, ceng’aeu hag gvaq le guh ndaej Cuengh Gun song vahsaw sonhag.

Geiz beizyinbanh neix youz yienh gyauyuzgiz bued ngaenz daeuj banh, youz yienh Sawcuengh hagdangz baij lauxsae daeuj hwnjdangz, cin cunghsinhyau Sawcuengh fujdaujyenz dang banhcujyin.

(Ganh Sozvwnz Veiz Gyah- meiz/甘说文 韦家梅sij Lij Cin Luzmingzdiz/李 振 陆鸣笛 ingj)