Caeklaiq ndaej saefouq vunz- guhnaz Cauzsan daeuj daengz gizhaenx, gaisau gij gingniemh gyoengqde daihmienhcik ndaem haeux mouxcanj ndaej 1600 gaen haenx, hawj aen swnghcanjdui neix yawj raen le bonjfaenh caeuq vunzrog lij doxca haujlai. Dajbeij naeuz, baenzlawz yungh haexvaiz haexmou, Cuzveiz Swnghcanjdui dwg dak hawq yungh, Cauzsan dwg cuengq roengz cingjhaex bae oemq yungh. Vunzguhnaz Cauzsan naeuz, haexvaiz haexmou dak hawq le, bwnhyauq ceiqnoix deng sai bae 60%-70%, cigsoh cuengq haeuj cingjhaex bae oemq, yungh fa hoemq maenh, bak rap bwnh cix ndaej bak rap bwnhyauq. Gij seyenz aen gunghse neix cungj laihnaeuz vunzguhnaz Cauzsan gangj ndaej miz dauhleix, gyoengqde cungj ciuqbanh, dangbi cix ndaej mouxcanj mauhgvaq cien gaen, youh ndaej yamq hwnj mbaeklae moq ndeu. Seyenz cungj angq naeuz: “Ndaej saefouh bouxak Cauzsan sonyinx le dou cij ndaej baenzneix ndei.”

Luzcai Yen Dacau Gunghse Giuyen Swnghcanjdui, raen mbanj- nden Sanhvanh Swnghcanjdui miz vunzguhnaz Cauzsan daeuj guh nazyienghbanj, sim miz di mbouj sangj, naeuz: “Ndaem naz miz maz nanz, lai coq di bwnh baujcingq ndaej ok lai.” Gyoengqde cix youq baihhenz ra ndaej gaiq nazbiz ndeu, coq gaeuq bwnhdaej, lij coq le 70 gaen vafeiz, caegcaeg caeuq vunzguhnaz Cauzsan doxbeij. Gyoengqde cungj dwg ndaem go’ganjsang, byawz liuh daengz coq bwnh gvaqbouh le, go’gyaj maj ndaej riengjretret, da yawj cix yaek ngeng lo. Seizneix, vunzguhnaz Cauzsan daeuj lwnh gyoengqde naeuz, ganjvaiq baiz raemxnaz liux bae, hanhceih go’gyaj majhung. Gyoengqde ei vah vunz- guhnaz Cauzsan bae guh, doeklaeng cij mienxndaej go’gyaj gvaqcaeux ngeng. Gij seyenz aen swnghcanjdui neix cungj simfug lo, cungj haenh vunzguhnaz Cauzsan funggek sang, dinfwngz ak.

Gih henz goengloh daj Nanzningz daengz Vujmingz haenx, youq baih- henz Sanghgyauz, miz gaiq nazyiengh- banj vunzguhnaz Cauzsan ndaem ndeu, daegbied angjda. Bonjlaiz, gizneix cix gig cangh ndaem haeuxnaz, hoeng gij nazyienghbanj vunzguhnaz Cauzsan ndaem haenx engqgya ak, gogo maj ndaej caezcupcup. Vunz lohgvaq cungj haenh mbouj dingz. Veiz Gozcingh lohgvaq gizneix, caemh aeu dingz yawj baez ndeu, de naeuz: “Gijneix dwg goengfou caen ha! Vunzguhnaz ceiq gangj saedcaih, da raen cix dwg saehsaed. Dingz nazyienghbanj neix hawj vunz simfug lai, de beij gijmaz senhconz cungj engqgya miz yauqgoj.”

(caengz sat)