Yaep hohfwngz suenq daeuj, gou dangq lauxsae daengz seizneix gaenq ndaej cib seiq bi lo, ndaej gvaq gvaq cibsam aen cietlauxsae. Moix baez daengz ngoenzciet, cungj miz hagseng soengq laex hawj gou, lumj miz cenjcaz、 daengdaiz、bit, hoeng hawj gou ceiq nanzlumz dwg gaem va hagseng daj gwnzbya mbaet ndaej soengq hawj gou haenx, gaem va haenx dwg gou dang lauxsae daeuj sou ndaej gij laex cietlauxsae ceiq dijbauj ndeu.

Bihaenx 9 nyied, gou deng faenboiq bae aen hagdangz ndawrungh ndeu sonhag. Haethaenx bet diemj cung, gou dawz mbaw sawbauqdaengz cuengq haeuj daeh, aemq di doxyiengh couh bae hagdangz bauqdaengz lo.

Gou byaij youq gwnz gij lohbya ngutngutngeungeu haenx, gwnz loh gig noix raen vunz baedauq. Aenvih ngamq bizyez faenboiq couh deng haeuj ndawrungh bae, seizde gou mboujcaengz rox roen, cij ndaej boux ndeu youq gwnz roenbya byaijndiekndiek, hoengq byaij gvaq geij goengqbya lij caengz ra raen aen hagdangz haenx, yawj bae naj, bya goengq dab goengq, gou ngeiz dwg mbouj dwg byaij roen loeng lo. Doeklaeng caeklaiq youq gyangloh nyangz goenglaux langhvaiz ndeu, de naihsim lwnhnaeuz gou nyi, gou cij rox coh diuz loh iq aen hagdangz haenx byaij bae.

Byaij ha byaij ha, sawqmwh dingqnyi lumj miz sing gaeq haen, ndwn youq gwnz dingjbya yawj roengz laj bae, laeglinzlinz, aen mbanj haenx youq laj dinbya, iqetet. Aen hagdangz haenx couh dwg youq ndaw runghlaeg runghgeq neix, byaij roengz diuz lohbya lingqlangq haenx bae, haemq nanz cij byaij daengz ndaw hagdangz. Gou yamq haeuj hagdangz, yawjraen baihrog hagdangz mboujmiz dou, miz song fungh ranz cukciengz, gwnz dingj ranz hoemq vax, conghcueng dwg aeu faexmwnh daep baenz, yienznaeuz gwnz dingjranz cang miz geij benq vaxgingq, hoeng ndaw gyausiz lij miz di fuemx. Song fungh ranz haenx, fungh ndeu dwg gyausiz, fungh ndeu dwg fuengz lauxsae lienz ranzbanhgoeng, gwnzdieg caengz beiq suijniz, lij miz di cumx dem. Doiqnaj dwg aen cauhcangz iq, laj go makbizbaz gwnz cauhcangz laemh duzmax vunz ndaw mbanj dem, aen neix dwg hagdangz lwi? Yawjraen yienghneix, ndawsim gou doeknaiq raixcaix.

Ngamq haeuj daengz ndawhag, gyoengq hagseng launyaenq dwk, mbouj gamj daeuj dep gou, itcig daengz boux lauxsae ndeu daj ndaw gyausiz byaij okdaeuj riengz gou gaemfwngz le, gyoengq hagseng cij gamj comz gvaqdaeuj. Boux lauxsae neix dwg Vangz lauxsae, de ngoenz- gonq ngamq daj boux lauxsae minzban cienjcingq baenz lauxsae gunghbanh, ranz de couh youq ndaw mbanj neix, nienzgeij gaenq daengz duiyouh lo, gou couh dwg deng baihgwnz anhbaiz daeuj ciep aen ban de. Vangz lauxsae gaemfwngz gou ndaetndet bae, gikdoengh dwk naeuz: “Vangz lauxsae ha, mwngz daeuj couh ndei lo, gyoengq lwghag muengh mwngz daeuj son gyoengqde hag gyoebyaem Sawgun caeuq bujdunghva, gou geq lo, mbouj hab son bang lwgnyez neix lo……”Yienzlaiz, Vangz lauxsae mbouj cienmonz hag gvaq gyoebyaem Sawgun caeuq bujdunghva ne.

Rox gou dwg bae sonsaw hawj gyoengqde, sawqmwh, ndaw hag doq hoengh hwnjdaeuj: “Dou miz lauxsae moq lo, dou miz lauxsae moq lo! Daeuj boux lauxsae coz youh mbauqndei ndeu!” Gyoengq hagseng angq dwk buet hwnjdaeuj hemq naeuz. Ndaw mbanj bouxlaux lwgnyez cungj ganj daeuj lo. “Ho, ndei lai lo, mwngz daeuj daengz, lwg bouxrungh dou miz fukheiq bw! Ngoenzlaeng, gyoengq lwgnyez neix dou couh cuengqsim gyau hawj mwngz lo!” Boux daxgoeng ndeu gaemfwngz gou gangj mbouj dingz. Gou baez daih’it ndaej baenzlai vunz humx dwk, rox daengz boux lauxsae baenzneix ndaej vunz aeueiq, ndawsim gig gamjdoengh. Yawj gij najriu vunzmbanj haenx, dingq gij vah gyoengqde hawj vunz sim’unq haenx, haxbaenh gij doeknaiq gou seizneix gaenq mboujmiz lo, ndawsim dauqfanj gikdoengh hwnjdaeuj, itcig daengz seizneix hix mbouj lumz ne.

Aen hagdangz neix heuhguh Nazgamz Siujyoz, daengx aen hagdangz miz samcib it boux hagseng, cij miz it daengz sam nienzgaep, hagseng caemh aen gyausiz ndeu hwnjdangz. Ngoenz daihngeih, ciep gvaq bonj gobwnj Vangz lauxsae, gou couh hainduj hwnjdangz lo. Ndaw gyausiz mbouj- miz gyangjdaiz, cij miz song benq hwzbanj. Dangz go ndeu, gou aeu son sam aen nienzgaep, hawj song aen nienzgaep hagseng sij cozyez, aen nienzgaep ndeu hwnjdangz moq, hwnj yijvwnz liux caiq hwnj suyoz, aiq dwg lwgnyez youq ndawrungh haemq lauxsaed ba, hix aiq dwg gou dwg boux lauxsae moq ngamq daeuj, seiz hwnjdangz, hagseng caemrwgrwg yunghsim dingq gangj, hag ndaej geijlai nyinhcaen, mbouj miz saek boux guhcaemz.

(caengz sat)