Raeuz cungj rox, maksiglouz mboujdanh yingzyangj lai, ndawde hamz veizswnghsu beij makbingzgoj、makleiz lij sang gvaq 2 boix, caemh ndaej gaj non dingz siq, siucawz mehmbwk gwnghnenzgiz daengj cozyung.

Maksiglouz hamz miz ndang vunz aeu miz lai cungj yingzyangj doxgaiq, gwn ndip ndaej nyinh conghhoz、seng raemx gaij hozhawq, caemh ndaej gyagoeng baenz cingliengz yinjliu dem.

Maksiglouz daengx go cungj baenz yw, ndaej yw haujlai cungj bingh. Va de singq bingz, feih saepsoemj, ndaej yw ae ok lwed、bwt in、mehmbwk dawzsaeg mbouj swnh. Yw ae ok lwed seiz, mbaet aeu 24 duj vahau ma caeuq di begdangz ndeu baek gwn. Yw siq nanz mbouj ndei, ndaej aeu naeng maksiglouz gaeuqgeq ma ring sauj ngenz mienz, aeu raemxreiz heuz gwn, lij ndaej yw laeuhcing、gyak naeng’vaiz、din humz、gahengh hwnj baez. Rag de ndaej dawz daeuj gyoenq deh、yw binghnauzcungz、yw mak gietsig yw binghnyouhdangz. Mwh yw mak gietsig seiz, ndaej aeu rag de、ginhcenzcauj gak 30 gwz baek raemx gwn, yaugoj cibfaen ndei.

Yozlij seizneix yenzgiu ndaej rox, gij va、naengmak、naengrag de ndaej dingj nengz、dingj binghdoeg, doiq buzdauzgiuzgin saekgimvuengz、luznungz ganjgin、gezhwz ganjgin、bienqhingz ganjgin gij hanhhaed cozyung de gig mingzyienj. Linzcangz aeu naeng maksiglouz daeuj baek raemx gwn, yw ahmijmaj oksiq daengj lai cungj bingh- ganjyenj haemq ndei, aeu rag de baek raemx gwn, ndaej gaj raeg nondizcungz. Geij bi daeuj, Yizbwnj yihyozgai yenzgiu yungh maksiglouz daeuj yw binghdaep、hezyaz sang、doenghmeg giet ndongj hix miz itdingh yaugoj.