Mbanjlajdonh miz cib geij ranz vunz, cungj dwg bouxlaux caeuq lwgnyez youq. Baihlaeng Mbanjlaj- donh seiqmienh cungj dwg ndoi, daih’iek miz sam bak lai moux gvangq.

Mbanjlajdonh miz dah ndeu heuhguh Dahcinh, 13 bi lai, vunz maj ndaej gvai, gig dwggyaez. Bohmeh Dahcinh bae rog dajhong, ciengzgeiz mbouj youq ranz. Dahcinh caeuq daxbuz youq ranzmbanj gvaq saedceij. Dahcinh gig gaenxhong, saeg buh、cawj gwn、rwed byaek、gip fwnz……yienghyiengh rox guh.

Miz ngoenz singgeizroek ndeu, Dahcinh gwed hanz hoij cag dawz liemx gag boux ndeu bae gwnzndoi laengmbanj gip fwnz. De daeuj daengz gwnzndoi baez yawj, yo, diegndoi gvangqlangh neix ndoq- ndangndang. Dahcinh gag ngeix: “Gij diegndoi neix dawz daeuj ndaemfaex liux bae, geijlai ndei ha!” Dahcinh raen laj dinndoi baihhaenx miz geij gyaz oen hung, de couh byaij gvaqbae yawj, Dahcinh raen geij gyaz oen haenx gaenq deng vunz raemj goenq youq gizhaenx, de angq raixcaix, sikhaek cuengq hanz beiq cag daeuj rom fwnz. De riu naeuz: “Ngoenzneix gou canh lo.” Dahcinh ngamq dauz ndaej boek fwnz ndeu, sawqmwh miz boux sai hung ndeu gwih cimozdoz daeuj daengz henz de. De baez doeksaet, suk fwngz lau gip fwnz lo. Boux sai haenx naeuz: “Dahniq, gij oen neix dwg gou raemj, gou mbouj aeu, mwngz aeu liux bae. Gou raemj oen bae yaek ndaemfaex.” Dahcinh mbouj ndei eiqseiq naeuz: “O, dwg yienghneix, docih daxau!” Dahcinh dawz fwnz mbiengj ndeu bae cuengq, boux sai haenx couh deu oen comz guh boengj ndeu, diemj feiz coemh bae lo. Ngoenzhaenx, Dahcinh gungh aeu ndaej seiq rap fwnz dauqranz. Daxbuz haenh de aeu fwnz caen ak, lij daengq de aeu haeujsim ancienz.

Gvaq 20 lai ngoenz, youh daengz ngoenz singgeizroek lo, Dahcinh gwn haeuxromh le, youh bae aeu fwnz. De daeuj daengz gwnzndoi laengmbanj baez yawj, raen gwnzndoi lajndoi cungj ndaem miz faex lo, doxvang doxsoh gogo doxcingq, lumj baenz aeu maesienq bengq gvaq cij ndaem nei, de haenhcwdcwd, hozhaenz dangqmaz. Dahcinh raen laj dinndoi baihhaenx dingz miz geij aen ci, henz ci miz cib geij boux ganbu cimyawj seiqmienh ndoi, cimyawj gij faex ndaem ndaej caezcingj haenx lwnhgangj gijmaz. Dahcinh couh byaij gvaqbae yawj nauhyied. De raen miz boux lingjdauj sangngau ndeu bongx mbaq boux ndeu naeuz: “Lij yanghcangj, mwngz guh ndaej ndei, sam ngoenz seizgan couh dawz 300 lai moux diegndoi ndaem rim gofaex, caen liux mbouj hwnj!” Boux yanghcangj haenx naj riunyumnyum, angq dwk gaem fwngz boux sang haenx naeuz: “Docih lingjdauj gvansim!” Boux lingjdauj haenx cienq naj gvaqdaeuj raen Dahcinh, couh doiq Dahcinh naeuz: “Dahniq, mwngz daeuj aeu fwnz ha, gaenx hong bw, gig ndei ha. Baihndoi haenx miz haujlai nyefaex, dwg daj gwnz gofaex ndaem haenx lwt roengzdaeuj, mwngz bae aeu baema dwkfeiz ceiq ndei lo.” Dahcinh angq naeuz: “Docih bohlungz, gou couh bae aeu!” De gangj sat couh bae aeu fwnz lo. Ngoenzhaenx, Dahcinh youh gip ndaej geij rap fwnzndip ndwi.

Youh gvaq ndaej 20 lai ngoenz, dwg ngoenz singhgiz ndeu, Dahcinh youh bae ndoi aeu fwnz. De daeuj daengz gwnzndoi laengmbanj, raen youq laj dinndoi baihhaenx, miz geij aen ci caeuq geij boux ganbu vix seiqmienh ndoi cingq gangj gijmaz. Dahcinh couh roengzbae yawj nauh- yied. Mbat gonq boux lingjdauj sangngau haenx lij roxnaj Dahcinh, de raen Dahcinh le, couh byaij gvaqdaeuj bek mbaq Dahcinh naeuz: “Ngoenzneix youh miz daihbaj fwnz hawj mwngz aeu lo.” Dahcinh daengx hung song cehda cam de: “Fwnz youq gizlawz?” Boux lingjdauj haenx naeuz: “Gyae youq bienmbwn, gyawj youq dangqnaj. Mwngz bae ciemz gofaex ngamq ndaem roengzbae haenx couh dwg lo.” Dahcinh couh yut go faex ndeu hwnjdaeuj, baez yawj, de doeksaet liux, daihsing naeuz: “Aeya, aeu nyefaex daeuj baek ha, cungj faex neix mbouj miz ragfaex baenzlawz ndaem lix ha, dwg boux lawz guh saehndip neix? Daengx ndoi faex cungj dwg nyaenx ha?” Dahcinh siengj mbouj doeng, nanzdauh gyoengq bouxlaux mbouj rox gofaex mboujmiz rag ndaem mbouj lix ma? Boux lingjdauj haenx naeuz:“Dwg nw, 300 lai moux diegndoi cungj dwg baek nyefaex, mwngz ndaej ciemz sat bae, dawz bae ma dwkfeiz.” Boux sangngau haenx youh doiq bouxsai henz ndang de naeuz：“Ndwen gonq, yanghcangj sou heuh daengx yangh ganbu caeuq song aen cunghyoz saeseng aeu nyefaex daeuj neix ‘ndaem’, baih- gwnz daeuj genjcaz gvaq le, raen de ndaem miz baenzlai faex, sicwngfuj ciengj haujlai ngaenz hawj yangh de. Seizneix, de boihseiz lo, geij ngoenz gonq, miz vunz gauq de daengz sicwngfuj lo. Ngoenzneix dou daeuj neix cazyawj rox caengyaj lo.” Dahcinh youq henz dingq daengz gij neix, doeksaet liux.

Dahcinh yienznaeuz youq gwnz- ndoi ciemz ndaej haujlai nyefaex, hoeng, sim de cix mbouj angq saek di.