Bonjbauq siusik(gicej Liengz Cingz/梁 晴) 10 nyied 26 daengz 27 hauh, daihsam gaiq daengx gih siujhagseng doxdax aeu Vahcuengh byauhcunj gangj goj youq Nanzningz gawjhengz, baez hozdung neix youz Swcigih Gyauyuzdingh cawjbanh、Gvangjsih Gyauyuz Yozyen coengh- banh, 105 boux siujhagseng daj ndaw gih Cuengh Gun song saw vah siujyoz daeuj camgya doxdax. Swcigih Gyauyuzdingh fudinghcangj Bwz Cifanz camgya aen yizsi haidaeuz caemhcaiq gangjvah, Gvangjsih Gyauyuz Yozyen fuyen- cangj Vangz Hinghveih、Swcigih Gyauyuzdingh Minzcuz Gyauyuzcu cucangj Veiz Lanzmingz、Gvangjsih Gyauyuz Yozyen Cwngzyinz Gyauyuz Yozyen yencangj Couh Yiznanz camgya yizsi haidaeuz. Gvangjsih Minzcuz Gyauyuz Fazcanj Cungsim cujyin Couh Gwzyih cujciz aen yizsi haidaeuz nem aen yizsi guhsat.

Youq doxdax seizde, doengh- boux siujhagseng camgya doxdax de daenj ndangdaenj Bouxcuengh, gig bienz dwk aeu Vahcuengh byauhcunj gangj goj gig ndeidingq youh miz yinx. Bouxdingq nem bingzveij dingq ndaej gig gvaqyinx, bekfwngz bobbob.

Gyoengqde haenqrengz doxdax song ngoenz, bingzveij gungh bingz ok itdaengjciengj 10 boux, ngeih- daengjciengj 25 boux, samdaengj- ciengj 40 boux, gujliciengj 30 boux.

Baez doxdax neix dwg baez hozdung baijok gih raeuz gij cwngzgoj gvendaengz Cuengh Gun song saw vah sonhag, gig ndei dwk coicaenh hong Cuengh Gun song saw vah gyauyuz fazcanj, doiq henhoh nem hungzyangz gih raeuz gij vwnzva minzcuz maenhndei de gig mizyungh.