Seizcou mboujdanh dwg seiz aenndang bouxvunz ceiq cwxcaih, caemhcaiq dwg aenseiz goekbingh fatbingh ceiq hoengh haenx, danghnaeuz loq mbouj haeujsim, couh gojnwngz rox yinxfat baenz conghsaej ganjyenj, cauhbaenz siqdungx. Seizcou baenz siqdungx dingzlai dwg aenvih gwnndoet yinxhwnj, gyoetndat caez gwn roxnaeuz haijsenh caeuq lwgmak caez gwn, cungj miz gojnwngz rox fatseng cungj saeh neix.

Gyoetndat caez gwn rox gig dungxsaej yinxfat baenz siqdungx. Haujlai lwgnyez haengj aeu gijgwn ndat caeuq binghgizlinz doengzcaez gwn, mbangj lwgnyez haengj mienh gwn raemxdang ndat, youh siengj doengzcaez gwn yinjliu gyoet. Neix couh lawq lo, dohraeuj gijgwn raemhrwnh bienqvaq rox cauhbaenz nemmuek dungxsaej mbouj doengz cingzdoh deng sieng, yinxhwnj dungxsaej supsou gijgwn mbouj swnh, habbaenz haex saw siq ok lumj raemx nei.

Haijsenh caeuq lwgmak caez gwn cauhbaenz siqdungx. Bya、nyauh daengj cungj hamz miz danbwzciz caeuq gai gig lai, danghnaeuz caeuq makit、maksiglouz、maksanhcah、lwgndae doengzcaez gwn, mboujdanh danbwzciz yingzyangj gyaciz doekdaemq, caemhcaiq rox hawj gij gai caeuq youzsonh ndaw haijvei giethab baenz gij doxgaiq mbouj yungzheih siuvaq. Gij doxgaiq neix gig dungxsaej le, aenndang bouxvunz couh mbouj cwxcaih, youqgaenj seiz dungxsaej ok lwed, baenz mbaeu cix okyienh rueg ok、gyaeuj ngunh、rub myaiz caeuq dungx in、siqdungx daengj binghyiengh. Ndigah, gwn haijsenh le gaej doq sikhaek gwn lwgmak.

Mbouj noix vunz baez siqdungx couh yungh yw gangswnghsu, neix mboujdanh doiq fuengzceih bingh mbouj miz yungh, lij rox caenh’itbouh sienghaih ndang vunz menjyiz goengnaengz dem, hawj aenndang gaenq deng sienghaih gvaq engqgya hawnyieg. Ndigah, cawz boux baenz dungx in youqgaenj ndaej youq canghyw cijdauj lajde daeuj doiq bingh yungh yw le, itbuen mbouj cujcangh yungh yw. Vihneix conhgyah daezsingj naeuz, yawhfuengz gij bingh mbouj dwg sigin ganjyenj baenz siqdungx seiz, gvanhgen dwg hanhhaed gwnndoet, ra ok gij goekgaen gwnndoet dapboiq mbouj ngamj、cauhbaenz dungxsaej supsou deng gaz haenx okdaeuj.