Bi 1964 ndwen 10 ndawnyieb, 760 lai boux vunzak dajndaem Cauzsan, faenbied bae daengz gij swnghcanjdui 6 aen digih、46 aen yienh si Guengjsae cienz gingniemh.

Veiz Gozcingh daegbied daengq naeuz, gij dieg fanzdwg anbaiz miz bouxak dajndaem Cauzsan bae ndaem nazyienghbanj haenx, gij goengdaeuz dangdieg aeu caenndang bae simhoengz dakdaih, genj ndei gij dieg ndaem nazyienghbanj, caemhcaiq bang gij bouxak gaijgez ndei guh hong、gwndaenj daengz gak cungj vwndiz. Ganbu caeuq vunzmbanj dangdieg aeu hwnjheiq dingjrengz caeuq gvansim bouxak gwndaenj, hawsim yiengq bouxak hag dinfwngz, hag gij gingniemh caez bae. De iugouz gij bumwnz gak gaep nungzyez aeu nyinhcaen diemjcaz dukcoi, gidij roengzmaenh.

Gij bouxak Cauzsan souh ndaej hoj, funggek goj sang. Baez daengz gij diemj, couh caeuq ganbu swnghcanjdui bae yawj doenghnaz. Gozdingh gij dieg guh nazyienghbanj haenx le, doq doenghfwngz vat gij cingjbwnh gyaeujnaz, guhdaeuz bae rap haex nyouh, guh gak cungj hong bwh geng. Haeujcin le, gipseiz cingj ndei nazgyaj, cimqceh coingaz, doekceh ganqgyaj、ndaemgyaj, dauhdauh goengfou cungj aeu genhciz byauhcinj sang, guh ndaej gig maenhndei. Gyoengqde cawz ndaem ndei nazyienghbanj le, lij fouzsei dwk son gij dinfwngz dajndaem ok haeux lai haenx hawj vunzlai. Miz mbangj bouxak lij mbouj lau dwgrengz, bin bya bin ndoi, byaij lohgyae, bang gij gogyaj sedui wnq “yawjbingh”, hwnj dou bae son dinfwngz. Gyoengqde naeuz, seiz ngamq ok ranzmbanj, goengdaeuz gyoengqde cix haenq daengq naeuz yaek aeu hawsim yiengq beixnuengx vunzmbanj Guengjsae hagsib, guh ndei doxgiet, doengzcaez siumied doeklaeng, hawj gij dinfwngz dajndaem senhcin ndaej youq Guengjsae doekrag、haiva、baenzmak, vih daengx guek demcanj engqlai haeuxgwn guh ok gung’yen.

(caengz sat)