Dahva dwg vunz lajmbanj, daxmeh de ciengz bingh, guh mbouj ndaej hongnaek, hong reihnaz ca mbouj lai cungj dwg daxboh boux ndeu guenjgoq, ndawranz gungzhoj.

Dahva cuhcungh bizyez le, ndawranz mbouj miz naengzlig gung de hwnj gauhcungh, de cijndei daeujdaengz ndawsingz dajgoeng——bang vunz gai buhvaq, aeu cienz ma ranz gung daegnuengx doegsaw.

Dahva ngeihcib bi bihaenx, ndawsingz guh senjgyaeu doxdax, Dahva bae camgya, buek ndaej dah’it mingz, bienqbaenz daengx singz boux dahsau ceiq gyaeu’ndei ndeu.

Daeggiengz dwg bouxlwg ranzmiz ndeu. Dahva okmingz le Daeggiengz couh bae laeh de. Daeggiengz song sam ngoenz couh duj vameizgveiq hoengzfwdfwd ndeu soengq hwnj Dahva; haj loek ngoenz couh geu buhvaq youh bengz youh gyaeundei soengq hawj Dahva. Hoeng Dahva mbouj doenghsim, Daeggiengz hix mbouj saetheiq, cix dwg sij mbouj ndaej cuengqfwngz laeh de. Doeklaeng youh soengq diuz gimlwenq gouh soijngaenz ndeu hawj Dahva, hoeng Dahva lij dwg dawz mbouj dingh cawjeiq.

Aenvih Dahva ndawsim gaenq miz vunz lo. Songde dwg doengzhag youh dwg caemhmbanj, gyadaej hix doxdoengz. Bouxhaenx ndawranz beixnuengx lai, de dwg lwgdaih, de aeu bang bohmeh gemjmbaeu di rap- naek ndeu, ndigah cuhcungh bizyez couh daengz ndawsingz daeuj daj- goeng, gung daegnuengx dahnuengx doegsaw.

Dahva caeuq de gaenq mieng gvaq:“Cograwz, mbouj dwg mwngz mbouj aeu, mbouj dwg de mbouj haq.”

Daeggiengz raen Dahva lij mbouj ciepcoux de, couh mbouj guenj mbouj goq heuh aen gouhgih ndeu bae cek aen ranznamh iq daemq lajmbanj Dahva haenx bae, cij yungh song ndwen seizgan, couh hwnj baenz aen laeuz sam caengz gyaeundei ndeu hawj bohmeh Dahva.

Daengx ranz vunz deng gij vah gij guh Daeggiengz gikdoengh lo.

Daeggiengz dauqdaej aeu ndaej Dahva guhyah lo, ngoenz gietvaen haenx, rwenz doh daengx aensingz, nauhyied dangqmaz.

Daeggiengz dwg boux mbauqndei ndeu, doeg gvaq dayoz, de miz cienz gangjvah ndongj. Dahva caeuq Daeggiengz guh gvanbaz caen dwg mbwnboiq deihhab, wnggai vuenyungz. Hoeng, songde hix miz saeh nyapnyuk.

Goekgaen dwg youq gwnzndang Dahva. Moix hwnz Dahva guh fangzhwnzloq seiz, cungj dwg hemq “Daegveih、Daegveih” aen coh neix. Daeggiengz deng gijneix cauz singj lo, de nyuknyaenq Dahva singj dauq, cam: “Mwngz hemq gijmaz?” Dahva buenqsingj buenqmoengx dauq cam: “Gou hemq gijmaz?” Daeggiengz naeuz:“Mwngz heuh ‘Daegveih, Daegveih’!” Dahva baez dingq, naj miz di hoengz, naeuz gou mbouj heuh, gangj sat cienq ndang youh ninz lo.

Yaepyiet, Dahva youh guh fangzhwnzloq,caemhcaiq lij dwg hemq“Daegveih Daegveih” aen coh neix, Daeggiengz baez singj, nyuknyaenq Dahva, naeuz: “Mwngz youh hemq lo.” Dahva dingq le miz di simhaw, dauq naeuz: “Mwngz fatbag.” Gangj sat youh ninz lo. Mwh de caiq hemq coh Daegveih seiz, Daeggiengz aeu soujgih daeuj loegyaem.

Ranzrongh le, Daeggiengz cuengq loegyaem hawj Dahva dingq, gij sing“Daegveih Daegveih!”haenx loegyaem ndaej cingcing cujcuj.

“Mwngz caeuq gou caemh mbonq, ndawsim cix siengj bouxwnq, hawj gou baenzlawz souh ndaej?” Daeggiengz gangj sat haenqrengz fak naj Dahva mbat ndeu. Dahva daej ngungu gutgungq youq gwnz mbonq, ndang saenzdedded. Daeggiengz yawj le sim’unq lo, de dwg caen gyaez Dahva ha. Hoeng, de rox, cungj saeh saetnaj neix mbouj baenz gangj okrog bae, baengh gaemxgienz moeb daeuj gaijgez saehsingz engqgya mbouj habdangq. Daeggiengz yiengq Dahva nyinhloek, lij aeu vahndei daeuj nai de dem, cam de “Daegveih” dwg byawz? Dahva gangj saedvah, naeuz dwg bouxyoux daj iq guhdoih ndeu.

“Seizneix mwngz lij gyaez de lwi?”

“Gou doiq mbouj hwnj de.”

“Mwngz yiemz de gijmaz? Dwg ngaenzcienz lwi?”

“Mbouj yiemz gijmaz.”

“Yienghneix mwngz baenzlawz cungj hemq coh de ne?”

“Gou mbouj rox.”

“Mwngz gyaez gou lwi?”

“Gyaez!”

“Caen gyaez?”

“W!”

“Baezlaeng mbouj ndaej caiq hemq coh de bw.”

“W.”

Hoeng, byonghhwnz Dahva guh fangzhwnzloq lijdwg cungj hemq “Daegveih Daegveih!”.

Daeggiengz daiq Dahva bae yihyen yawj bingh. Boux canghyw hai le haujlai yw, Dahva gwn le geij ndwen yw, hix mbouj raen ndei, caemhcaiq lij yied daeuj yied haeujnaek dem. Moix daengz buenqhwnz, de baez moengzloengz，youh“Daegveih Daegveih!”heuh ndaej deihdin, sing hix engq gya daih.

Daeggiengz naeuz:“Raeuz liz- vwnh ba!”

Dahva naeuz:“Mbouj!”Gangj sat daejunj ing ndaw rumj Daeggiengz bae.

Baenzlawz guh ne? Daeggiengz gig simnyap.

Daeggiengz bae ra boux miz cawjeiq ndei haenx, dawz gij bingh Dahva caeuq gij nyapnyuk swhgeij lwnh de nyi. Boux haenx naeuz: “Neix mizmaz hoj, dawz aen coh mwngz gaij guh “Daegveih”couh ndaej lo.”

Daeggiengz caen gaij mingzcoh dahraix. Gaenlaeng de haemhhaemh maqmuengh Dahva heuh de, hoeng, Dahva mbouj heuh lo, gij bingh de mbouj yw gag ndei lo.