Gou miz aen ranz vuenyungz ndeu, ranz gou miz sam boux vunz: Daxmeh gyaez raemh、daxboh gyaez ndaem va、gou gyaez riu.

Daxboh gyaez ndaem va, ndigah gyanghongh ranz gou ndaem rim gak cungj gak yiengh va nywj：Vacouxcin、valamz daengj cib lai cungj. Daxboh gig gyaez gyoengqde bw! Seizhah, daengngoenz ndat lumj feiz nei ciuq dwk gwnz dieg, daxboh couh hawj gyoengqde gaq bungz dangj raemh; seizdoeng, daxboh dawz gyoengqde buen haeuj ndaw ranz ma ndoj nit. It bi seiq geiq, daxboh cungj mbouj lumz hawj gyoengqde rwed raemx、dwk bwnh、gaeb non……

Daxmeh gig gyaez raemh. Moix baez dienheiq bienq liengz, henz rwz dou cungj yiengj hwnj gij vah daxmeh:“Daenj buh lai di, siujsim dwgliengz.” Miz ngoenz ndeu, cuengqhag seiz, sawqmwh doek fwnraq, gou cij ndaej soemh fwn ma ranz. Gou ngamq haeuj ranz, daxmeh raen gou daengx ndang dumzdwddwd, lienzmuengz hawj gou vuenh buh, lij dauj boi caz raeuj ndeu hawj gou gwn, yienzhaeuh yungh sujbaq bang gou mad gyaeuj, doq mad doq raemh:“Mwngz baenzlawz mbouj caj gou bae ciep mwngz, mwngz yawj mwngz yienghneix, dwgliengz le baenzlawz guh ya, vaiq bae ninz yaep ndeu.”

Gou gig gyaez riu. Daxboh naeuz gou daengxngoenz cungj riuhaha, di hix mbouj miz gij yiengh vwnzcing lwgsau. Mizseiz riu hix gig guenjyungh. Miz baez ndeu, daxboh daxmeh aenvih gienh saeh iq ndeu doxceng hwnjdaeuj. Geij ngoenz gvaqbae le, gyoengqde lij mbouj gangjvah, byawz hix mbouj leix byawz. Yienghneix, gou couh yawjyawj daxboh, youh yawjyawj daxmeh, nyaenx mbouj ndaej riu ok sing daeuj lo. Daxboh raen le, hix nyaenx mbouj ndaej riu lo, daxmeh hix riu lo.

Neix couhdwg gij goj ranz gou. Gou siengsaenq moix boux doengzhag cungj caeuq gou ityiengh miz aen ranz vuenyungz ndeu.

（指导老师： 罗 凤）