Cunghyih nyinhnaeuz, makit ndaej ik heiq bouj lwed、seng raemx gaij hozhawq、 cangq dungx leih raemx. Ndang vunz ginggvaq aen geiqciet seizhah ndataeng le, rom miz daihliengh huqdoeg, caemhcaiq ndaw ndat youqgaenj, aen ndang naetnaiq, makit ndaej leih nyouh, ngamq haeuj cou seiz, habdangq gwn di makit he, ndaej baiz huqdoeg ok rog ndang daeuj, siucawz ndaw ndat.

Makit nding hamz miz nizconjmeiz, gwn de ndaej hawj sailwed bienq unq、vued lwed vaq cwk, fuengz lwed saek youq, boux sai sim lwed miz bingh mboujfuengz lai gwn di he. Makit hau ndaej bouj heiq bwt nyinh bwt, gig hab boux baenzae、boux diemheiq hidungj miz bingh gwn. Makit loeg ndaej cing ndat gaijdoeg. Makit aeuj hamz miz vahcinghsu, ndaej meijyungz youh ndaej dingj nyieglaux. Makit ndaem cix nyinh yaem ciengx mak、ndaej hawj byoem hau bienq ndaem.

Daj yingzyangj gakdoh daeuj gangj, gwn makit wngdang lienz naeng lienz ngveih itheij gwn, aenvih ngveih caeuq naeng de comz miz gij makit ndawde dingzlai yingzyangj. Danghnaeuz lienz naeng lienz ngveih mbouj ndei gwn, cix nap aeu raemx de daeuj gwn. Hoeng, aenvih makit singq bien liengz, boux dungx caep baez dog mbouj ndaej gwn daiq lai.