Hagdangz gou youq diuzloh Gyauyuzlu, de gyaeundei raixcaix, henz bakdou hagdangz miz geij cih saw ndongqsag “Denhdauz Sizyen Yozyau”, daengngoenz baez ciuq, gij cih haenx ronghyabyab, gig ndei yawj.

Byaij haeuj bakdou, dou daeuj daengz cauhcangz, cauhcangz gig gvangq, danghnaeuz mwngz hopheux cauhcangz buet gvaengx he, haengjdingh baegfofo. Dou maij cauhcangz lai lo, baez daengz dangz dijyuz, dou cungj youq ndawde guh’angq; baez roengz dangz, gizneix dauqcawq cungj dwg sing riu.

Baihgvaz cauhcangz, couhdwg gyauyozlouz dou. Gij saek rog gyauyozlouz gig singjsien, caengz he dwg saek hoengz, caengz he dwg saek hau, hoengz caeuq hau doxboiq, engq gyaeu lo! Byaij haeuj ndaw gyauyozlouz, ngamq hwnj mbaeklae, couh dingqnyi gij sing doeg saw lo, daengz ndaw gyausiz, daiz daengq baij ndaej cingjcaez dangqmaz, gwnz ciengz ndaw gyausiz nem miz gij vahgangj bouxmizmingz, son gyoengqdou haenqrengz hagsib. Gyausiz dou caeuq gyausiz wnq doxdoengz, de ngoenznaengz geiqloeg dou baenzlawz maj hung. Youq ndaw gyausiz dou cungj roxnyinh raeujrubrub.

Baihnaj gyauyozlouz dwg duzsuhgvanj, ndawde miz haujlai saw, gou gingciengz bae gizhaenx doeg saw, youq gizneix gou hag ndaej gij cihsiz gwnz dangz mbouj miz haenx.

Gou gyaez hagdangz gou!(Bouxhoiz: Sugij)