Haetromh, gaeqmeh daiq gaeqnumh bae henz dah guhcaemz.

Byaij dwk byaij dwk, sawqmwh duz mbaj ndeu mbin gvaqdaeuj, duz mbaj haenx gyaeundei raixcaix, de daenj geu gunz saek lamz he, ndaw gunz lij miz haujlai dujva saek gyaemq dem. Gaeqnumh baez yawjraem duzmbaj, sikhaek buet bae coh de, gyaep ha gyaep, gyaep ha gyaep, mbouj rox gvaq geijlai nanz, duzmbaj sawqmwh mbin haeuj suenva bae mbouj raen lo. Gaeqnumh ra mbouj raen duzmbaj, cij siengj daengz daxmeh, hoeng de yawjyawj seiqlengq, cij rox swhgeij gaenq byaij haeuj giz luengqbya mbouj miz vunz ndeu, mbouj rox baenzlawz dauq ranz lo. Siengj daengz baelaeng caiq mbouj raen daxmeh, hix mbouj ndaej caeuq doengzdoih guhcaemz, de siengsim dwk daej- nganga.

Seizhaenx, duzroegenq dingjlingz mbin gvaq aen luengqbya, yawjraen gaeqnumh doq hemq daxmeh doq daejnganga, de gietsim bangcoh gaeqnumh ra daxmeh. Vihneix, de mbin daengz gwnz mbanj doenghduz bae ra daxmeh gaeqnumh. Sawqmwh, de yawjraen duz gaeqmeh he cingq doeng muengh sae yawj, simgip dangqmaz. Duzroegenq sikhaek duenqdingh de couhdwg daxmeh gaeqnumh lo. De mbin roengqbae doiq gaeqmeh naeuz:“Gou ra daengz lwg mwngz lo, youq ndaw luengqbya haenx.” Gaeqmeh simgip dwk sikhaek buet haeuj luengqbya, gaeqnumh baez raen daxmeh, couh coemj ndaw rungj de bae, angqvauvau dwk gangj mbouj ok saek coenz vah. Gaeqmeh umj gaeqnumh, unqswnh dwk naeuz:“Daxmeh youheiq lai lo, mwngz baezlaeng gaej yienghneix bw!”

Duzroegenq yawjraen gaeqnumh cimh daengz daxmeh le, vuenyungz dwk mbin bae lo.

(sam nienzgaep Dwng Siuhlungz)