Daxboh sawqmwh gvaqseiq le, gou caeuq dahnuengx yienghyiengh cungj baengh daxmeh lo.

Daxmeh gaxgonq ngoenznaengz cij hwnjban 8 diemj cung, seizneix hwnj baenz 12 diemj cung, roengzban le lij bang dou cawj haeux cawj byaek、saeg buh baet ranz, gij saeh daxmeh lumjbaenz cungj guh mbouj liux nei.

Ngoenzsinggeiz he, gou heuh daxmeh son gou cawj byaek. Gou caeuq daxmeh byaij gvaq bakdou ranz Siujcingh seiz, yawjraen geij mehbaj doxcomz gangjgoj, seiz mbouj seiz lij riuhaha.

Mehbaj he gangj: “Sou rox mbouj caengz, gij huq aen bouq bak haw roengz gyaq, cienh lai lo, gou baez he couh cawx baenz geij bak maenz!” Boux mehbaj wnq youh gangj:“Gij huq haenx cienh lai, mbouj gvaq cien song cien maenz gou cungj yawj mbouj hwnj da.” Dingqnyi gij vah neix, raemxda gou cungj gag loenq lo, daj daxboh lizhai dou le, daxmeh geu buh moq he cungj mbouj sij cawx gvaq.

Yawjraen dou byaij gvaq baihnaj, mehbaj he heuh daxmeh:“Mehlingz ha, mwngz baelawz lij ndang ndeu daiq lwgnyez gvaq ha? Sinhoj lai lo! Cungj gvaq baenzlai bi lo, mwngz hix wngdang bang swhgeij naemjnaemj, ra bouxbuenx he lo.”

“Mbouj sinhoj! Caeuq song bouxlwg doxyouq, gou ngoenznaengz cungj angq raixcaix!” Daxmeh riuhehe daiq gou byaij lo.

Neix couhdwg daxmeh gou! Yienz- naeuz de mbouj miz ngaenz, hoeng dou ciuqyiengh gig gyaez gig gyaez daxmeh dou.

(seiq nienzgaep Couh Caijlingz)