●9 nyied 27 hauh, “dinfwngz dajsiuq”Ndangdaenj Conzdungj Yauzcuz beizyinbanh youq Gvanyangz Yen gawjhengz haiban yizsi. Geiz beizyinbanh neix daj 9 nyied 27 hauh daengz 29 hauh. Gyawj 40 boux mehmbwk Yauzcuz daj Dungcingj、Sihsanh song aen Yauzcuz yangh nem gij cunh Yauzcuz yanghcin wnq daeuj de gungh camgya sam ngoenz mienxfeiq beizyin.

(Yangz Hihyinz)

●9 nyied 29 hauh banhaet, Sangswh Yen Minzcuzgiz youq ndaw yienh Nanzbingz Yauzcuz Yangh Gizgunhhih Gvangjcangz gawjbanh“2014 nienz Sangswh Yen Nanzbingz Yauzcuz Yangh laeb yangh 30 hopbi nem ndwen senhconz《Minzcuz Gihyiz Swcifaz》-‘minzcuz doxgiet、mbanj- ranz gyaeundei’sanhgohvei”, dang- ciengz fat saw minzcuz lijlun 3000 faenh、senhconz soujcwz 2000 faenh hawj gak cuz ginzcung.

(Lij Yiyungj)

●9 nyied 27 hauh,“ndangdaenj gyaeundei——Gveilinz Bozvuzgvanj gij ndangdaenj saujsu minzcuz baihsaenamz ndaw gvanj yo miz de baijok hozdung”youq Vuzcouh Si Bozvuzgvanj gawjhengz. Baez neix gungh baijok 120 gienh(dauq) doenghyiengh ndaw gvanj, baugvat 10 dauq ndangdaenj、32 gienh nda、78 dauq doenghyiengh ngaenz cangndang.

(Liuz Gozvwnj)

●9 nyied 27 hauh, gicej daj Swcigih Minzveij ndaej siusik: Guekgya Minzveij fatbouh daih’it buek 340 aen“Cungguek mbanj daegsaek saujsu minzcuz”an mingz venj baiz mingzloeg, gih raeuz Lungzswng Gak Cuz Swciyen Lozgyangh Yangh Mbanjdungcuz Baujcwng daengj 59 aen mbanj ndaej haeuj ndaw mingzloeg, gij soq neix baiz daengx guek daihngeih.

(Gvangjsih Yizbau)

●9 nyied 25 hauh, “Dava Yauzcuz Vangj”cingqsik haidoeng ndaej hwnj. Neix vih vunz Yauzcuz aen yienh neix ndaej fazcanj nem doenghboux vunz ndawbiengz yenzgiu Yauzcuz aen yienh neix daezhawj aen bingzdaiz ndeu.

(Vangz Vwnzboh)