Veiz Gozcingh lizhai Liengz- dungz le, lij itcig gvansim hwnjguh Liengzdungz, caemhcaiq lai baez dauqma Liengzdungz ngonzcaz, dingq vunzlai gangj yigen, sonyinx guh hong.

Gij ganbu caeuq vunzmbanj Liengzdungz, caemh gig ngeix boux “Lauxveiz” youq gizneix caeuq gyoengqde caemhhaemz caemhhoj, caeuq gyoengqde doengzcaez cauh ngoenzndei neix.

Bi 1990 seiz Veiz Gozcingh gvaqseiq ndaej hopbi, boux suhgi gonq Swcigih Dangjveij、boux veijyenz cunghguveij, boux goengdaeuz ciengzgeiz caeuq Veiz Gozcingh youq Guengjsae guh hong haenx Gyauz Yaujgvangh, cienzcingz bae ngonz Liengzdungz. Gou boux duiyenz gunghcozdui Liengzdungz neix, caeuq boux goengdaeuz gaemhong ranzbanhgoeng Cangh Loz、bouxhoiz Vahcuengh Veiz Gozcingh Lij Beizmou, caemh caeuq Goenggyauz guhdoih bae. Gij ganbu caeuq vunzmbanj Liengzdungz gyoeb- lwnh naeuz, gyoengqde moix vunz canj haeux gaenq ndaej 1600 lai gaen, canjcig gunghyez dwg 150 fanh maenz, moix vunz faenboiq ndaej gaenh 800 maenz. Goenggyauz yawj le gij bienqvaq moq Liengzdungz, youh dingqnyi gij vah cingzngeih naekna daihgya ngeixdauq Veiz Gozcingh haenx, nyaenx mbouj ndaej haengj- heiq denz le hot swz 《Ngeix Cinzngoz》he:

Liengzdungz ndei, gaijgwz daiq- daeuz buet hwnjheiq. Buet hwnjheiq, vunz ndaej bet bak, daengx mbanj maenhndei.

Ndaem doh haeuxhom caeuq mak faex, gunghcangj nungzgih nauh vuenheij. Nauh vuenhheij, ngeix gonq naemj neix, goeng gvi de ceij.

22、Bincingj Vunzguhnaz Cauzsan

Bi 1965 ndwen 5 co, Veiz Gozcingh youq Vujmingz caeuq Ho Yiyenz caeuq Nanzningz Diveij bouxfucwz Ganh Vaizyinh、Mung Gingyen ngeixyaeng gij hong “sw cing” Nanzningz Digih caeuq gij hong wnq le, cix gipmuengz dauqbae Nanzningz. Aenvih, banhaemh de yaek bae ciepraen boux lingxdoih caeuq mbangj cujcangj boux gisuz ak Gvangjdungh Swngj Cauzsan haenx, gyoengqde dwg souh iu daeuj Gvangjsih cienzson gij gingniemh senhcin guh hong nungzyez.

(caengz sat)