Ngoenz he daxmeh yaek bae reih dajndaem, mbwn laep cij ndaej dauqma. Yaek ok dou seiz daxmeh gangj naeuz haemh neix youz gou cawj haeuxcaeuz. “Cawj haeux? Caen dwg yungzheih lai lo!”Gou simyungz dwk sikhaek dapwngq, daxmeh daengq gijmaz gou cungj lumz dingq liux, angqangq yangzyangz aemq daehsaw bae hagdangz lo.

Banhaemh cuengqhag dauq daengz ranz, gou baez cuengq daehsaw, couh buet haeuj giz dajcawj, gou yaek cawj donq haeux rangfwdfwd he hawj daxmeh gwn, caemhcaiq naeuz hawj de gou maj hung lo, rox saeh lo. Gou sawqmwh yawjraen gwnz saeuq daxmeh louz mbaw ceij he. Laxlawz daxmeh lau gou mbouj rox cawj haeux cij youq gwnz ceij son gou ne. Gou liuq saek yaep couh vut mbaw ceij dauq gwnz saeuq, gag gangj gag naeuz:“Daxmeh, daeglwg mwngz mbouj baenz huk law, di saeh iq neix yaepyet couh guh ndei.”Baenzneix baez naemj, ndaw sim gou diemzsubsub.Gou sikhaek swiq moj rau haeux cuengq raemx, gaendwk couhdwg caux feiz lo. Aenvih ngamq doek fwn gij fwnz cungj mbaeq liux, gou diemj geij baez cungj mbouj dawz, mboujdanh feiz mbouj diemj dawz, daengx ranz cungj baenz oenq liux. Gou seiqlengq ra fwnz hawq, gizsaed daxmeh cungj bang gou bwh ndei lo, de lumjbaenz gauj gou nei, dawz fwnz hawq cuengq haeuj ndaw fuengz iq bae. Doeklaeng gou yungh fwnz hawq diemj dawz feiz lo. Gvaq mbouj geij nanz, haeuxcaeuz cawj ndei le, gou hix baegfoedfoed daengx ndang cungj unq liux.

Gou naengh gwnz daengqgeg, doq yietnaiq doq naemj: Caen dwg yawj hwnjdaeuj yungzheih guh hwnjdaeuj nanz ha. Daxmeh ngoenznaengz hwnq caeux ninz gvaiz, hawj dou daengx ranz vunz dajcawj, lij guh hong reihnaz dem, sinhoj lai lo. Swhgeij lij gingciengz yiemz de cawj ngaiz mbouj ndei gwn dem. Gou yied siengj yied gag roxnyinh doiq mbouj hwnj daxmeh. Ndaw sim gou gag roengz gietsim: Baezlaeng gou itdingh aeu hauqgingq bohmeh, cuengqhag le aeu lai bang gyoengqde guh hongranz, aeu guh bouxvunz roxsoq he.

(haj nienzgaep Cangh Nanz)