Veiz Gozcingh naeuz, gij yigen vunzcungq miz dauhleix, seizcou gvaq le cix ciuq dauq fueng’anq daihngeih bae guh. Doeklaeng, vunzlai Liengz- dungz yungh le song bi, gihbwnj guh sat gij hongdaengq bingzcingj nazreih Dadung, hawj gizneix ndaej guenq raemx、baiz raemx doxfaen, gij roen gihgi dajgeng caeuq gij roenvunzbyaij doxfaen, dangbi bingzcingj, dangbi dajndaem, dangbi demcanj.

Ciuq gij yigen Veiz Gozcingh, doihguhhong gonqlaeng bang Liengz- dungz guh le leihyungh nazreih、suijli、suennazvaq、mbefat giyez sedui daengj 4 hangh gviveh. Gij gviveh neix, miz mbangj lij youq seiz “seiq cing” cix ndaej guh baenz, miz mbangj dwg gvaqlaeng youz ganbu Liengzdungz daiqlingx vunzlai gag bae guh.

Liengzdungz aen diemj neix, doiq Veiz Gozcingh sonyinx Guengjsae guh hong lajmbanj miz gij yiyi youqgaenj. De youq gizneix yawj raen vwndiz le, cix cingj mizgven bumwnz ngeixyaeng, daezok gij banhfap gaijgez, liuxle cij doigvangq daengz gwnz mienh. Guengjsae mbefat caeuq doigvangq aennienjhaeux dienhdoengh、aensoiq- haeux、dohlahgih fwngzrex daengj gij gihgi nungzyungh siujhingz vunzlai maij neix, couh dwg youq Liengzdungz gizneix ndaej buqmoengz.

Veiz Gozcingh de lij giem guh boux cwngveij daeuzit Diegbing Guengjsae he, de bae maeuqdiemj lij gaem hong minzbing, caenndang gyonjcomz gij guhfap Liengzdungz giethab cingjdunq “4 cing” caeuq hwnjguh cujciz minzbing haenx, youq daengx gih doigvangq. Gij gyonjcomz de ndaej daengz cunghnanzgiz caeuq Diegbing Gvangjcouh yawjnaek, gaijfangginh cungjcwng ginzgunghbu caeuq cungjcanh dungyenzbu song aen bu neix faenbied yaenq baenz sawcek fat doh bingdoih. (caengz sat)