Ngoenz he, caeuq daxmeh ok dou bae youz, byaij dwk byaij dwk, gou sawqmwh yawjraen henz roen miz boux gaujvaq he cingq maeuq youq gokciengz guh gaujvaq. Daegde buh rwix vaq uq, faj naj iq ndaemndwtndwt, song lwgda launyaenq dwk yawj vunz bae vunz dauq.

“Bohmeh de mbouj guenj de, roxnaeuz dwg bohmeh de cungj gvaqseiq liux ne? De lij miz bouxcaen gizyawz lwi? Baenz nyaeq couh okdaeuj guh gaujvaq, hojlienz lai lo.”Gou gag naemj.

Gou doiq daxmeh naeuz:“Daxmeh, boux gaujvaq iq neix hojlienz lai, dou bae hawj de geij maenz ngaenz ba.”

Daxmeh riunyumnyum naeuz:“Baenz, daeglwg gou rox hojlienz bouxwnq, gijneix dwg saeh ndei.”

Dou byaij daengz henz ndang bouxgaujvaq iq, daxmeh doiq de naeuz:“Siuj baengzyoux, gou hawj mwngz geij maenz ngaenz ba.” Gangj sat, couh cuengq geij maenz ngaenz daengz ndaw vanjdiet de bae.

Bouxgaujvaq iq mbouj naeuz docih, cix yungh lwgda iq de gamjgik dwk yawj gou caeuq daxmeh. Dou byaij gyae le, gou lij nyaenx mbouj ndaej ngeux gyaeuj gvaqdaeuj yawj, lij raen bouxgaujvaq iq haenx muengh dou……

Ndaw sim gou naemj: Bouxgaujvaq iq neix baenzneix hojlienz, gou ngoenznaengz miz daxboh gyaez daxmeh maij, vuenyungz lai lo. Hoeng gou lij gingciengz mbouj dingq vah, caen mbouj wnggai lo, baezlaeng gou itdingh dingq gij vah bohmeh cij baenz.

(sam nienzgaep Huz Yizsenh)