Gou miz duz “moulwg” he, hoeng de mbouj caencingq dwg duzmou, cix dwg aen guenq romngaenz he.

Youq gizgyae yawj gvaqbae, “moulwg” daengx ndang cungj dwg hoengzmaeq, aj bak dwk riu- nyumnyum, dwggyaez lai lo. Gwnz aemq de miz aen vauq he, ndaej youq gizhaenx oet cienz roengzbae.

Miz duz moulwg neix le, gou ngoenznaengz cungj dawz gij ngaenzlingz mbaet roengzdaeuj haenx cuengq roengz ndaw dungx de bae, de moix baez cungj lumj gangj hawj gou:“Bouxcawj iq, mwngz youh gueng gou doxgaiq lo, caen ndei.” Ngoenz gvaq ngoenz, duz moulwg gou bienq naekswtswt.

Gou caeuq moulwg doxndiep lai lo.

Miz baez he, mbaw sigenj gou mbouj raen lo, gou nyapnyuk raixcaix, yawj gijmaz cungj mbouj habhoz. Dauq daengz ndaw ranz, gou couh buet bae ndaw fuengz ra, yawjraen moulwg cuengq youq gwnz daiz haenx, de mbwnj bak dwk, lumjbaenz doiq gou gangj: “Bouxcawj iq gaej nyapnyuk, baezlaeng mbouj baenzneix lujlaj couh ndaej lo.” Gou yawjyawj duz moulwg, riu lo.

Lij miz baez dem, gyoengq baengzyoux ndei gou bouxboux cungj miz gij baengzvaj swhgeij, couh gag gou mbouj miz. Gou cang hojlienz dwk yawj duz moulwg, moulwg lumjbaenz youh doiq gou naeuz: “Baenzneix ndei mbouj ndei, daj gwnz aemq gou dawz ngaenz okdaeuj, hoeng caenh ndaej cawx baengzvaj, mbouj ndaej luenh cawx gijwnq bw.” Yienghneix gou couh daj gwnz aemq moulwg mbon ngaenz okdaeuj, angqvauvau bae cawx baengzvaj lo.

Moulwg seiz mbouj seiz cungj bangcoh gou, danghnaeuz mbouj miz de, gou caen mbouj rox baenzlawz guh. Ndigah gou wnggai docih de.Gou caen maij duz moulwg gou.

(sam nienzgaep Yangz Cingyiz)