Gaenh bi daeuj, Lungzcouh Yen roengzrengz henhoh caemh haifat ndaw yienh doenghgij mbanj miz minzcuz daegsaek, gij mbanj neix goekdaej vwnzva laegna、yiengh- siengq byaraemx daegbied. Gij mbanj neix miz giz doxlumj youh miz giz daegbied: Mbanjbanjciz cungj ndaej vunzbiengz haenh guh “Sihsanghbanjnaz iq”, 1995 nienz ndaej haifat guh giz lijyouz; Mbanjbanjgiz doenghyiengh nem gizdieg ciuhgeq daegbied, gij vwnzva ciet Bouxcuengh noengzna; Mbanj- banjgiu liz henzguek 2 goengleix, funghcingz henzguek noengzna; diuz Gaisiujginhyiz dwg gizdieg yiengh- gaeuq lij ce ndei ndeu (dangqnaj daengx guek cijmiz sam giz); Mbanjlungzmaj baengh doenghgij ranzcanx baenz rangh baenz benq youh henhoh ndeiaet de okmingz.

Aen yienh neix ciuq dieg guhsaeh aeu lai cungj cosih daeuj haifat caemh henhoh doenghgij mbanj miz minzcuz daegsaek. Lumjgangj doenggvaq roengzcienz guh gihcuj sezsih nem dazyinx canjyez fazcanj haifat caemh henhoh gij mbanj neix. Aen yienh neix roengz 300 lai fanh maenz laebguh Mbanjbanjgiu minzcuz sifancunh nem comz gaijguh ranzgaeuq ranzyiemj, doenggvaq sevei fuzbinz、canjyez fuzbinz、hanghmoeg fuzbinz, dajcaux mbanj moq swnghdai lijyouz, bauj mbanj miz minzcuz daegsaek ndaej fazcanj、fazcanj ndaej ndei.

(Hij Cibingz/许志平)